Education atana sum dah duhkhawp lo

Students' Self-Support Union (SSU) chuan, kum 2017-18 Mizoram budget ruahmanah Education department tana sum dah leh hmasawnna hna thawhna tura sum dah a tlem lutuka an hriat thu sawiin, pawi an tih thu an tarlang.

SSU chuan, kum 2016-17 aia 2017-18 budget punna chu cheng vbc. 764.39 (9.51%) a ni tih sawiin, "KUm 2017-18 budget-ah School Education department tan vbc. 986.92 dah a ni a, Higher & Technical Education department tan vbc. 190.44 dah a ni. Education atana sum dah zawng zawng hi vbc. 1177.37 a ni a, budget pumpui aṭangin 13.37% a ni. Kum 2016-17 budget-ah Education atan vbc. 1147.31 dah a ni a, kum hmasa aia Education budget punna hi vbc. 26.69 niin, 2.32% chauh a ni," an ti.

School Education department bika budget punna chu 2.21% a ni a, HTE department budget punna chu 4.80% a ni tih sawiin, SSU chuan, "State pumpui budget punna 9.51% aṭanga chhûtin, Education bika budget punna hi a sang lo hle," an ti a; college development atan emaw, library tihhmasawnna tur atan emaw sum dah a awm lo chu pawi an tih thu an sawi.