KHAWTHLIR

Sorkar chuan thuchhuah siamin, sorkar laipuiin huaisen lawmman hrang hrang Jeevan Raksha Padak award a pek turah rawtna thlen theih a nih thu a tarlang a, "Lawmmante hi tuitla, chetsual­na, kângmei, electric chhiatna, leimin, ramsain mihring a beihna leh chhiatna hrang hrang laka mi dangte nunna chhan chhuaktute hnenah hlan ṭhin a ni," a ti. Hre chiang duh tan mahni awmna DC pisa, SDO pisa, IPR pisa leh BDO pisaahte zawh chian theih a ni.

Mizoram Board of School Education (MBSE) chuan nimin khan hriattirna ti­chhuakin, vawiina HSSLC Examination 2020 leh HSLC Compartmental Exam result an tihchhuah turah, MBSE pisa kawta result târ tura an tih chu ṭhulh a ni a, result tàr a nih dawn loh thu an puang a, "Result hi MBSE website www.mbse.edu.in-ah leh pdf format-in tihchhuah a ni ang," an ti.

Siaha SP chuan thupek chhuahin, Phúrà leh Vahia inkar kawngah Thawhṭanni, Nilaini leh Zirtawpni-ah lirthei tlân phal a nih loh thu a puang. Thupek hian July 15, 2020 aṭanga October 15, 2020 thleng a huam a; kawngpui PCC-a siam tur chu ṭha zawka siam a nih theih nan leh a hun taka zawh a nih theih nan chhuah a ni.

Covid-19 Task Group on Migrant Workers & Stranded Travellers chhinchhiah danin, state páwna tangkhang rawn haw tur mi 942 an la awm. Tangkhang rawn haw tawh mi 13,459 an awm a, an zinga 12,412 chuan quarantine faci-

lity an chhuahsan tawh. Hetih lai hian, Mizorama tangkhang an state/rama haw tur mi 62 an la awm a, Manipur leh Assam mite an ni.

Zoram Medical College (ZMC) laboratory-ah nimin khan swab sample 130 vel, State Referral Hospital-a awm sa te, Aizawl, Siaha leh Serchhip district aṭanga dawnte endik a ni a, nizan khan result a chhuah beisei a ni. July 12, Pathiannia endik result la chhuak lo 81 a awm bawk. Hetih lai hian, Lunglei Civil Hospital laboratory-ah Pathianni khan swab sample 31 endik a ni a, Covid-19 positive an awm lo.