Green Mizoram Day hman a ni ; CM-in thing lian tawh phun a rawt

Nimin khan Mizoram hmun hrang hrangah Green Mizoram Day hman a ni a, Aizawlah chuan chief minister Zoram­thanga hoin MINECO-ah hman a ni. Chief Minister chuan, thing ṭiak tereuh tê tê phun aiah thing lian tawh phun a rawt a, hma la nghal turin Environment, Forest and Climate Change (EFCC) department a chah.

Mizoram Youth Commission hall-a inkhawm buatsaihah CM Zoramthanga chuan, Tlawng lui leh lui dangte pawh, kum tinin ṭhálah a chîm chin a tlahniam tih sawiin, "Kan tui in tur fahran pawh problem a lo ni ṭan ta. Kan tihchhiat hnuah siamṭhat kan tum a, a la tlai lo e, siamṭhat theih a la ni, hma kan lâk a ngai. Thing kan phun hian tuihna kan humhalh a ni," a ti.

Zoramthanga chuan, Mizo mipuiin thing phun an uar tawh thu a sawi rualin, thing ṭiak tereuh tê tê phun tam tak chu a bula hnimte'n an dîp ral bakah tihchhiat a nih ṭhin avangin ṭha leh zuala tih dan kawng an zawn a ngaih thu a sawi a, "Thing ṭiak ft. 1, 2 lek lek kan phun hian a buaithlak lutuk, a lian law law phun tur i inpe ang u," tiin a rawt.

Thing lian zawk phun chu a ngaihtuah nasa tawh tih sawiin Chief Minister Zorama chuan, "Thing lian, mihring chen aia hniam lo, kan bán chen, chu aia sang pawh nei ila, kawtthlêr sîrah phun lawih mai ila. A survive ngei ngei ang. Kawng sirah phun ila, a dam khawchhuak ngei ngei ang. A buaithlak deuh pawhin kan tih a ngai," a ti.

CM chuan EFCC department chu thing lian zawk phun tur tam tak siam turin a chah a, "Pawisa in nei lo a nih leh rawn sawi u la, kan lo pe ang che u. Naktuk aṭangin hma la rawh u. A sang tél, a sing tél, a pot lo siam rawh u... Chu chu hma la ṭan nghal vat rawh u... Nakinah in ti ngei em tih rawn en kan duh a ni," a ti a; chutih rualin, thing lian deuh tawh phun tur siam nan kum 2-4 a ngaih tur thu a sawi.

Thing phun tur uluk a ngaih thu sawiin Zoramthanga chuan, "Khawpui chhungah chuan thing sang lutuk a tih chi loh," a ti a; khawpui chhunga phun atan thlado (chawnpui), herhse leh pár mawi chi leh rah ṭha chite a ṭhat a rin thu a sawi. Ramngaw humhalh leh eizawnna lam ngaihtuah kawp a ngaih thu sawiin, "Economic plantation nena kan kalpui a ngai," a ti.

Khualzahawm EFCC minister TJ Lalnuntluanga chuan, thing leh mau, nungcha humhalha tihchangtlun kawngah mi ṭhahnemngai tak tak an pung chho zel nia a hriat thu a sawi a, "Green Mizoram Day hi Mizoramin hma a sâwnpui ka ring a, ṭangkai taka kan hman zel ka duh," a ti.

TJ Lalnuntluanga chuan, ramngaw leh tuihna humhalhna turah rawtna neite chu lawm takin an dawngsawng thei tih sawiin, rawtna ṭha nei turin mipui a ngen a, "Mizoram River Protection Bill buatsaih mek a ni a, lui tui humhalh kawngah zau zawka hmalak theihna turin JICA project kan kalpui mek," a ti bawk.

Kumina Green Mizoram Day thupui chu 'Thing phun la, tuihna siam rawh' tih a ni a, a hmanna inkhawm hi PCCF Jitendra Kumar-a'n a kaihruai. Kum 2022 ṭhál laia kângmei veng ṭha district leh Aizawl district-a khuate hnenah lawmman hlan a ni a, inkhawm zawhah tlaizawng leh herhse ṭiak phun a ni.

Green Mizoram Day hi kum 1999-ah hman ṭan a ni a, kum 2012 thlengin June thla hun remchangah hman a ni ṭhin a, kum 2013 aṭangin June 11-ah hman a ni. Kuminah erawh chuan Inrinni a nih avangin nimin khan hman a ni a, hmun hrang hrangah thing phun beihpui thlâk a ni.