Samagra-a thawkte an inkhawmpui ; In hlawh a pung ngei dawn - Chief Minister

Federation of Mizoram Samagra Employee (FEMSE) chuan nimin khan Vanapa Hall-ah inkhawmpui an hmang. Khuallian, chief minister Zoramthanga chuan, Samagra Shiksha hnuaia thawkte hlawh a pun ngei dawn thu a sawi. FEMSE hian resolution pass-in 'hlawh punna tur ni 10 chhunga tihfel ngei nise,' an ti.

Inkhawmpui hi FEMSE senior vice president K Vanlal­thanzauva'n a kaihruai a; Chief Minister chuan, Samagra hnuaia thawkte'n hlawh tihpun an ngenna chungchang sawiin, "Hun rei tak chhung hlawh ngai reng in hlawh a, in hlawh hi a pung dawn hrim hrim. In hlawh punna zat tur erawh a la hriat loh. In hlawh a pun theihna atan hian Education Minister a ṭang na hle," a ti.

Zoramthanga chuan, Sama­gra Shiksha hnuaia thawkte hlawh punna tura ruahman chu Finance department lamin sum dinhmun thlirin tam deuha an hriat thu sawiin, "Chuvangin, ka hoin Education department leh Finance department hotute kan ṭhukhawm leh dawn a, chuvang chuan in hlawh hi a la pung lo a ni," a ti a; Finance department ruahmanna aia sanga tih dan ngaihtuah tura ṭhukhawm tur an nih thu a sawi.

Chief Minister chuan, Samagra Shiksha hnuaia thawkte dah nghehna tur kawng recruitment rules pangngaiah a awm loh thu sawiin, "Special arrangement chhawp chhuah a ni a, Cabinet-in a ngaihtuah. Covid-19 in min nuai loh lai ni se, in hlawh tihsana dah ngheh in phû. Hripui avangin kan tuar a, dam khawchhuah kan tum hram hram a ni. Tunah chuan hma lam kan pan chho ṭan tawh," a ti.

FEMSE inkhawmpuiah hian president R Lalnunhlima leh vice president R Lalrinpuia te pawhin thu an sawi a, chawhnu lamah ro an rel a ni. An thurel ṭhenkhatte chu - SPO aṭanga Samagra hnuaia thawkte earned leave order chhuak hmasa anga earned leave 100% neih theihna tura hmalak leh regularization atana special arrangement siam tura ruahmanna awm chak taka bawhzuite a ni.

Resolution 'Samagra employee-te hlawh tihpunna tura Finanace department proposal chu kan pawm thei loa, FEMSE proposal ang ngeia tihpun nise, ni 10 chhunga tihfel ngei ni rawh se,' an ti. FEMSE hi August 23, 2019 khan Samagra Shiksha hnuaia pawl parukte'n hlawh leh service chungchanga hamṭhatna an neih theihte bawhzui leh hma la tura an din a ni a, member 4,500 chuang an awm mek.