Governor-in ICAR a tlawh

Governor Dr Hari Babu Kambhampati chuan nimin khan Kolasib-a Indian Council of Agricultural Research Centre (ICAR) a tlawh a; ICAR mithiamte buatsaih thlai leh ran zirbingna lehkhabu pathum a tlangzarh.

Larsap chuan, ei leh bàra intodelh tura hmalak a pawimawh thu sawiin, "Sorkar laipui ruahmannaa mirethei zawkte khawsak dinhmun chawikanna tur scheme-te hi a nih tur ang taka a dawng tur àwm takte'n hamṭhatna an hmuh a pawimawh. Chumi tur chuan mahni chanvo hriat chian hi mi tin mawhphurhna a ni," a ti.

ICAR enkawlna hnuaia loneitute thil thar chhuahte chu man man zawka tihral a nih theih nan a hlutna tizual turin a sawngbawlna leh a tuam mawi dan thlenga hmasawn turin Governor chuan a chah a ni.

Kolasib DC John LT Sanga pawhin thu sawiin, Governor-in sorkar hnuaia hamṭhatna hrang hrangte mirethei leh kut hnathawktute thleng pha tura a ngai pawimawh chu sorkar hnathawkte tan chona leh phûrna thar petu a nih a beisei thu a sawi.

Governor hian nimin vêk khan Mizo IR 1st battalion hmunpui, Mualvûm a tlawh bawk a, Commandant leh officer dangte nen an inkàwm a ni.