KHAWTHLIR

Thisen pe
Salvation Army Youth, Central South Division chuan nimin khan Ebenezer Corps hall, Venghnuaiah thisen pek an huaihawt a, Ebenezer CO bial leh Gilgal CO bialte'n thisen unit 47 an pe a, mipa 37 leh hmeichhia 10 an ni. Thisen petute chu Ebenezer bial aṭangin mi 29, Gilgal bial aṭangin mi 12 leh bial pawn aṭangin mi paruk an ni. Bualpui Branch YMA pawhin nimin khan VC House-ah thisen pek an huaihawt a, Kolasib District Hospital tan thisen unit 27 an pe a, petute mipa 16 leh hmeichhia 11 an ni.

In pahnih hawng
Aizawl North-II bialtu MLA Dr Vanlalthlana chuan nimin zing khan a bial chhunga Ramhlun Venglai YMA Meeting Room a hawng a, chhunah Ramhlun Venglai MUP Building a hawng bawk. In hawn tâkte hi MLA fund hmanga sak a ni.

Legal awareness
Mizoram State Legal Services Authority leh Mizoram Law College-a zirlai, internship ti mekte chuan Green Mizoram Day pualin nimin khan Rangvamuala BSUP Complex-ah Legal Awareness Campaign an buatsaih a, MSLSA member secretary R Vanlalena'n hmanpuiin, dan leh hrai hriat tur pawimawh zualte a sawi. Thing ṭiak eng emaw zat phun a ni bawk.

Zirlai lawmpui
Mizo Zirlai Pawl headquarters, Lunglei chuan nimin khan Saikuti Hall-ah kumin HSLC leh HSSLC-a Mizo zirlai ti ṭha mi 108-te chawimawina an buatsaih a, minister C Lalrinsanga'n a hmanpui. Minister chuan, zirlaite chu an tumah chiang tur te, chhawr tlak thiamna paw chhuak tur leh Lunglei tana ro hlu ni turin a chah.

Language forum
ELF Learning Solutions, Chennai-in CSR aṭanga cheng nuai 12 an pek hmanga sap ṭawng a bulthûm aṭanga zirna English Language Forum (ELF) chu nimin khan Lunglei DC Kulothungan A-a'n a hawng. Hmalakna hnuaiah hian Lunglei district-a primary school 61-a zirlai 3,000 velin English an zir dawn a ni.