Congress-in an sorkar laiin health care-ah Cheng khat mah an dah lo - Zoramthanga

Chief minister Zoramthanga chuan, Mizoram Health Care Scheme (MSHCS) atan Congress party-in kum 10 sorkarna an chan chhungin cheng khat mah an dah lo niin a sawi.

Nimina Federation of Mizoram Samagra Employee khawmpui a hmanpuinaah Chief Minister chuan, "Sorkarna kan han chan leh hnuah MSHCS kan han en chiang a, kan awm loh chhungin cheng khat mah dah belh a la awm lo. Kan chhuahsan ang angin a pungte nen a lo la awm a ni," a ti.

Zoramthanga chuan, sorkarna an chan leh hnuah kum 2019 khan MSHCS atan cheng vbc. 50 an dah leh nghal nia sawiin, "Mipui hriselna lama inenkawlna atan bul kan ṭan leh. Kum tin cheng vbc. 50 kan dah belh chuan kum nga chhungin vbc. 250 a tling hman ang a, Mizoram mipuiin a zár an zo thei ang kan ti a ni," a ti a; Covid-19 avangin an tum anga thil an tih theih loh thu a sawi.

Chief Minister chuan, Covid-19 lên hma kum 2019 velah Mizoram sorkar sum dinhmun a ṭha nia sawiin, "Nuam pawh kan ti a, Covid-19 a rawn thleng a, min hrêk ta char char a ni. Thil dang kan ngaihtuah hman lo, dam khawchhuah dan kan ngaihtuah. Hripui avangin khawvel, India economy a tlahniam a, kan hmuh tur ang kan hmu lo nasa hle a ni," a ti.