New Education Policy zirho a ni

Nimin khan Aijal Club-ah New Education Policy (NEP) zirhona buatsaih a ni a, Higher & Technical Education (HTE) minister Dr R Lalthangliana'n a hmanpui. Zirhona hi district tina higher education zirtirtute puala buatsaih a ni.

HRE Minister chuan, NEP inkaihhruaina chhungah Mizoram tana ṭha tura kalpui theih dan tur ngaihtuah a ṭul thu sawiin, "Hmasawnna ruhrel din leh kan neih sa cheiṭhat bakah, Mizoram zirna siamṭha tura kan state bilin kan mamawh, ram dangte tan pawha entawn tlak tura kan invawrh theihna tur dap a, ngaihtuahna sên a ṭul," a ti.

Result ṭha neih a ropui rualin, thiamna tak tak paw chhuak a, zirlaite'n chhawr tlak thiamna an neih a pawimawh thu sawiin Minister chuan, "Hna tlángláwn diltu tam tak an awm ṭhin laiin, Mizoramin a mamawh ni si, thiamna bik neih ṭul hna ṭhenkhatah dil thei tur kan inhmu zo lo ṭhin hi a pawi hle. Thiamna daihzai leh kil tin deng chhuak thei kan mamawh," a ti a, theihtawp chhuah turin zirtirtute a chah.

HTE secretary Esther Lal Ruatkimi tarlan danin, NEP hnuaiah India ram chu zone hrang hrangah ṭhen a ni a, Mizoram chu Zone-2 chhunga Region-3 ah Nagaland, Sikkim leh Tripura-te nen an awmho a ni.

Zirhonaa tarlan danin, Mizoramah under graduate zirna college 21 leh constituent college pakhat a awm a, higher institution hrim hrim 41 awmin, chu'ng zingah chuan Mizoram, University leh National Institute of Technology an tel.