Mizoram pumah Green Mizoram Day

Nimin khan Mizoram hmun hrang hrangah Green Mizoram Day (GMD) hman a ni a, thupui chu, 'Thing phun la, tuihna siam rawh' tih a ni. Kumin ṭhál laia kângmei véng ṭha khuate hnenah chawimawina hlan a nih bakah, thing phun beihpui thlâk a ni.

Lungleiah chuan Mizoram Polytechnic campus-ah hman niin, Lunglei HPC vice chairman Lawmawma Tochhawng, MLA khuallian a ni a, sorkar department leh pawl 43-te'n thing ṭiak 376 an phun.

Lunglei district-a kângmei veng ṭha ber Bualte khua hnenah Rs 50,000 hlan a ni a, pahnihna Chawilung South hnenah Rs 30,000 leh pathumna Thenhlûm hnenah Rs 20,000 hlan a ni. Thing phun enkawl ṭha sorkar department leh pawlte hnenah leh essay inziahsiaka ti ṭhate hnenah lawmman hlan a ni bawk.

Champhaiah chuan Keilungliah tuikhuah kamah hman a ni a, bawrhsap James Lalrinchhana khuallian a ni. Kângmei ven kawnga hma la ṭha khua leh chanchinbute hnenah lawmman hlan a ni a; kângmei veng ṭha ber chu Bungzung a ni a, Lungphunlian leh Hruaikawn ten an dawt. Chanchinbu hma la ṭha ber chu Lenrual a ni a, Pasalṭha leh Rihlipui te chu pahnihna leh pathumna an ni.

Champhai DFO Lalduhthlana tarlan danin, GMD-ah hian Keilungliah tuikhuah kam bakah, New Champhai-Zokhawthar kawng leh Khankawn-Zotlang kawngah thing ṭiak 1,095 phun a ni a; hnatlangah mi 1,026 an tel.

Kolasib-ah chuan DC Circiut House-ah GMD hman a ni a, minister of state K Lalrinliana'n a hmanpui. Kolasib district-a kangmek veng ṭha ber Kolasib Vengthar, pahnihna Bairabi North leh pathumna Ṭumpui te hnenah chawimawina hlan a ni a; Regional Sports Training Centre, Saidanah thing phun a ni bawk.

Serchhip district-ah chuan Thenzawl Golf Course & Resorts Convention Centre-ah GMD hman a ni a, district bawrhsap Nazuk Kumar-i'n a hmanpui a, Golf Course chhehvelah thing phun hnatlang neih nghal a ni.

Serchhip district-a kângmei veng ṭha zualte chu - pakhatna Lungpho, pahnihna Zote South leh pathumna Bungtlang an ni a; kângmei ven kawnga thawh hlawk chanchinbu Lenkawl hnenah lawmman hlan a ni bawk.

Lawngtlaiah pawh DC pisa tualah GMD hawnna inkhawm neih a ni a, LADC chief executive member mawhphurhna la mektu Lallawmsanga Apetow khuallian a ni. Inkhawm zawhah Kaladan Multi Modal Transit Transport Project (KMMTTP) kawngpui sir, Lawngtlai aṭanga km. 9 vela hlaah thing ṭiak 350 phun a ni. Lawngtlai district-a kângmei veng ṭha ber chu Archhuang khua a ni a, Siachangkawn leh Vawmbuk Vaivakawn ten an dawt a ni.