Covid-19 vei an pung leh hret hret

June 9, Ningani khan Mizoramah Covid-19 vei mi 34 hmuh chhuah a ni a, hripui vei hmuh zat leh positivity rate a tam hret hret. Nimin khan hripui vei dam tawh mi 21 chhuahtir an ni a, Covid-19 positive thi an awm lo.

Ningania Covid-19 positive hmuh chhuahte chu mipa 18 leh hmeichhia 16 an ni a; RT-PCR hmanga hmuh mi panga, TrueNAT hmanga hmuh pahnih leh RAT hmanga hmuh 27 niin, positivity rate 14.47% a ni.

IDSP record angin, Mizoramah Covid-19 vei 2,28,512 hmuh chhuah a ni tawh a, mipa 1,06,389 leh hmeichhia 1,22,123 an ni a, mipa aiin hmeichhia 15,734-in an tam zawk. Nimin tlai dar 5 thleng khan mi 2,27,692 (99.64%) chhuahtir an ni tawh a, mi 700 (0.31%) thi tawhin, enkawl mek mi 120 (0.05%) an awm.

Nimin tlai dinhmun angin, Mizorama district 11 zinga district panga - Siaha, Champhai, Kolasib, Lawngtlai leh Hnahthial district-ahte Covid-19 positive an awm tawh rih lo a; positive enkawl lai mi 10 leh a aia tam awmna district pali awmin, positive tamna ber Aizawl district-ah mi 38 an awm a ni.