Sorkar hnathawk hlawh batsak chhan MNF ṭhalaite'n an sawifiah

Mizo National Youth Front (MNYF) chuan, state budget aṭanga chhûtin sorkar inrêlbàwlna (revenue expenditure) a sang em em a, hmasawnna hna thawhna tur (capital expenditure) a tlem avangin, hripui lêng dona atana sum sènso tur pawh capital expenditure aṭanga pawt loin, revenue expenditure (sorkar inrêlbàwlna sum) aṭanga tum a ni a, sorkar hnathawk hlawh pûksak a nih thu an tarlang.

MNYF thuchhuah tarlan danin, tun hnai kum eng emaw ti chhunga Mizoram annual budget-ah revenue expenditure chu budget pumpui aṭangin 75%-80% vel a ni tlangpui. Annual Financial Statement 2020-21-a a lan danin, tuna budget cheng vbc. 10,715 aṭanga sorkar inrêlbàwlna tura beisei chu vbc. 9020.85 (84.20%) a ni a, hmasawnna hna thawhna tur (capital expenditure)-a beisei chu vbc. 1693.15 (15.80%) a ni.

Mizoram chu state rethei tak a nih avangin, state budget aṭanga chhûtin, capital expenditure a tlem avangin pawh hêk ṭhen emaw, tihkhawtlai emaw a uiawm tih sawiin MNYF chuan, "Hei vang hian kan hri lénga senso tur pawh mipui chanvo pawt hêk lo záwngin, budget aṭanga revenue expenditure aṭanga phuhrûk tum a ni a, sorkar hnathawk hlawh pawh pûksak a ni," an ti a; tun hnaia work order a chhuak chu lawmawm an tih thu an sawi. MNF Ṭhalaite chuan, chief minister Zoramthanga'n tun hnaia lirnghing tuartute a ngaihsak a, theihtawp a chhuah thu an tarlang bawk.

MNYF chuan, lirnghingin Mizoram hmun ṭhenkhata a sãwi vanga mipui chî-àina chu Chief Minister-in a hre reng a, theihtawp a chhuah tih sawiin, "Tunlai hri léng karah Mizoram sorkara engkima engkim leh pawimawh ber a nih avangin awm hmun chhuahsan a rem lo a, zan riaka a hmun tlawha zin chhuah hi thil remchang a nih loh avangin a aiawhin minister/MLA a tír a, sorkar laipuiah hma a la mek reng bawk. A hmalakna hi lirnghing tuarte pawhin an thlamuanpui kan beisei," an ti.

MNF ṭhalaite tarlan dan­in, lirnghing hriat ṭan a nih veleh CM Zoramthanga tirhin minister TJ Lalnuntluanga'n a tlawh a, East Tuipui bialtu MLA Ramthanmawia'n a ṭul ang angin hma a la nghal. June 26, 2020-ah CM hoa ṭhutkhawmnaah lirnghing na zawk a thlen palha inbuatsaih dan tur leh ei leh bara chhuanchham an awm loh dan tur an sawiho. Disaster Management & Rehabilitation Minister Lalchamliana hoin vawiduailo ṭhutkhawm a ni a, July 6 khan DMR department hotu leh mithiamte'n lirnghinna hmun an tlawh kual a ni. Chief Minister chuan July 10-ah Union Mines minister Pralhad Joshi hnenah lehkha ziakin, mipui thlabâr dante a ziah bakah, lirnghing chu ngun leh uluk taka a hmuna zir chiangtu tur mithiam tír turin a ngen bawk.