Bru thil phût an pek dawn chuan Mizote min pek ve a tul ang: Hawla

Chief minister Lal Thanhawla chuan, Tripura refugee camp-a Bru-te thil phût sorkar laipuiin a tihhlawhtlin dawn chuan Mizo mipuite pek ve a ṭul tur thu a sawi a, "Kei ni chuan tumah autonomous district council (ADC) kan pe lo ang," a ti.

MNF member Lalruatkima zawhna kal zelah Chief Minister chuan, "Bru-te thil phût hi Central-in an pe dawn a nih chuan Mizorama awm sate min pe ve tur a ni. Mizo zingah Bru-te thil phût ram acre 5-a zau ram leh hamṭhatna dang hrang hrangte chu Mizo zingah nei lo tam tak an awm," a ti a; Bru-te thil phût dang ADC pek chu sorkarna an chan chhung chuan a hlawhtlin loh tur thu a sawi.

Lal Thanhawla chuan, Bru-te chu an duh thu ngeia Mizoram chhuahsan an nih thu sawiin, "Chuti chungin lo kir leh turin kan ngen a, an lo kir duh lo. Sorkar laipuiah a chhe thei ang berin min hêk a, Hindu an nih vanga tihduhdaahte min puh a ni. Hindu an nih kan hre ngai lo," a ti.

Home minister R Lalzirliana chuan MNF member Lalruatkima zawhna chhangin, Bru-te hruai kir turin road map pali siam a nih tawh thu a sawi a, "Bru-te hian Mizorama lo kir turin an thil phût an tihbelh zel avangin tun thleng hian lak kir theih an ni lo," a ti.

Home Minister tarlan danin, Bru lak letna atan hian sorkar laipui aṭangin Road Map-I ah cheng vbc. 2.43, Road Map-II ah vbc 2.43, Road Map-III ah cheng vbc. 17.84 leh Road Map-IV ah cheng vbc. 17.2 hmuh a ni tawh. Road Map I, II leh III atana sum hmuhte chu hman zawh a ni tawh a, Road Map-IV atana sum hmuh aṭangin vbc. 9.7 inpuahchahna atan hman a ni.

November 2016-a neih zawh tawh, Bru Identification Process aṭanga a lan danin, Tripura refugee camp-ah hian Mizoram khua leh tui dik tak Bru chhungkua 5,507 an awm a; Mamit district-a chhungkua 4,199, Lunglei district-ah chhungkua 384 leh Kolasib district-a chhungkua 824 an awm a ni.

Bru-te thil phût
1. Chhung tin hnenah thlai chinna tur ram acre 5 ṭheuh pek
2. Bru lak lette khaw khatah a khawma dah
3. An khaw awmnaah electric, tui, sikul, damdawi-in, ek-in, kawng ṭha, etc. siam/pek
4. Ramhnuaia thing leh thlaite zalen taka lak/hman phal
5. Compensation sum Rs. 80,000 aṭanga Rs. 10,00,000-a tihpun
6. Bru chhungkua zawng zawng hnenah ration card thar pek
7. E-Roll revision neiha Bru zawng zawng thun luh leh E-Roll revision kum tin neih
8. Dampa Sanctuary-a a tira an chhuahsanna hmuna awm let
9. India Constitution Article 244 (2) leh 6th. Schedule zûlzuia Bru tana autonomous district council pek

Mizoram sorkar ngaihdan
1. Chhung tin hnena ram acre 5 pek a rem lo
2. Khaw khata dahkhawm turin ramin a daih loh bakah, thingtlang eizawnna lo neih pawhin a daih lo ang
3. An awmna tura ruahmanaah electric, tui, sikul, damdawi-in, ek-in, kawng ṭha, etc. a awm tlangpui, a awm loh chuan ngaihtuah tur
4. Danin a phalsak ang zela pek
5. Sorkar laipui thuneihna a ni
6. Mizoram mi leh sa an ni tih finfiahte chu ration card pek mai tur
7. Mizoram sorkarin tihluihna hman a tum lo
8. Dampa Sanctuary-a an awmna hmasate chu phalna nei loa khaw din (bâwk)-te a ni a, Sanctuary tihzauhna atan khua sawn chhuah zel a ni zawk
9. Mizoram sorkarin autonomous district council pek a remti lo