KHAWTHLIR

Medical camp
T Romana College chuan an kum 25 tlin pualin Thawhṭanni khan Indian National Fellowship Centre, Mumbai nen ṭangkawpin an college-ah ‘National Integration & Medical Camp’ an buatsaih a, Governor Lt.Gen. Nirbhay Sharma-a'n a hmanpui.

VLCSC hawng
Serchhip District Legal Services Authority chuan nimin khan Thenzawlah dan leh hrai lama harsatna nei, puih ngaite puihna leh dan inzirtirna hmun, Village Legal Care & Support Centre (VLCSC) an hawng. VLCSC hi Thenzawl West V/C House-ah dah a ni a, Nilainiah chawhma dar 10 aṭanga chawhnu dar 2 thleng hawn ṭhin a ni dawn.

Gutkha man
Food & Drugs Administration leh Serchhip District Anti-Tobacco Squad ṭangkawp chuan, nimin khan New Serchhip leh a chhehvelah Joint Operation an nei a; gutkha, pan masala, zarda, vaihlo leh nicotine telna ei tur zawrh phal loh eng emaw zat an man a, dawr neitute chu zuar tawh lo turin an hriattir nghal.

Aiawh dah phût
MZP Sub-Headquarters, East Lungdar chuan thuchhuah siamin, East Lungdar High School-a thawk F Lalthlamuani, general teacher (RMSA) chu sorkarin a post chawpin Kolasib-ah a sawn tih an tarlang a, "Ṭha kan ti lo hle. Sawn a nih pawhin a aiawh zirtirtu dah a nih hma chuan a chhuak tur dan hial kan tum," tiin, a aiawh tal dah turin sorkar an phût tih an puang.