MIFCO-a thawk thinte'n arrear pek an phût

MIFCO EER Pensioners' Association (MIFERPA) chuan, Mizoram sorkar chu an hlawh arrear an la lak lohte pe thuai turin an phût a; MIFCO chu March 31, 2017 ral hmaa mimal kuta hlan (privatise) a nih loh chuan Court-a zualko an tum thu an puang.

Mimal kuta MIFCO hlan a nih dawn vanga Early Retirement Rule (ERR) hmanga châwl ta te, MIFERPA-te chuan nimin khan Aizawl Press Club-ah thuthar thehdarhtute an kâwm a; an president Ngurthansanga chuan, ERR hmanga chhuah chu an duhthusam ni lo mah se, a ṭulna vanga chhuah a ngaih thu a sawi.

Ngurthansanga chuan, MIFCO-a thawkte chuan financial rules hranpa an nei lo a, Mizoram sorkar hnathawkte hlawh lak dan angin an lak ve mai thu sawiin, "6th. Pay pawh kan hmang ve a, mahse, kum 2012 khan kan hmang ṭan chauh," a ti a; ERR hmanga an chhuah dawnah arrear tih loh sum an dawn tur angte chu an dawn thu a sawi a ni.

MIFERPA President sawi danin, MIFCO hi December 19, 1989-ah din a ni a, Mizoram sorkar chu a neitu (100% share neitu) a ni. Mizoram sorkarin MIFCO chu mimal kuta hlan tura a tih avangin hna thawktute chu ERR 2015 hmangin a duh apiang chhuah theih a ni tih a hriattir a, mi 56 chuan ERR hmanga chhuah an thlang.

ERR hmanga chhuah loh a, privatise a nih hnu pawha la thawh zel thlangtu pawh an awm a, tunah hian mi 21 an la thawk mek nia an hriat thu an sawi.

Ngurthansanga chuan, ERR hmanga an chhuahnaah hamṭhatna an dawn turte chu dawng kim tawh mah se, kum 2012 aṭanga 6th. Pay an hman ve chauh vanga 6th. Pay arrear-te chu pek kim an la ni lo tih a sawi a, "Kan Managing Director-in 'December 2016-ah kan pe ang che u,’ tiin min thlah a, mahse, tun thlengin min la pe lo. Arrear leh medical reimbursement bill min la pek lohte min pe kim thuai turin kan phût a ni," a ti.

Finance department lehkha ang chuan, MIFCO hi March 31, 2017 ral hmaa privatise fel tura tih a ni a, vawiin nen ni thum hun a la awm. Hun tiam chhunga privatize a nih loh chuan MIFERPA chuan en liam mai an tum lo a, Court-ah zualko ngei an tum thu Ngurthansanga chuan a sawi.

MIFERPA President chuan, MIFCO-a thawkte chu June 2016 thleng bak sorkarin hlawh a pek loh tur thu a hriattir tih sawiin, "June 2016 thleng bak hlawh pe lo tura insawi si, MIFCO-a thawh chhunzawm thlangte tun thlengin hlawh a la pek bakah, kan chhuah hnuah thawktu muster roll an lak belh niin kan hria," a ti bawk.