Eizawnna kawng zawn dan zirtir

DoNER leh MAHFED ṭangkawp chuan, nimin khan Aibawk RD Block conference hall-ah kut hnathawktute'n tih dan ngai ngawr ngawr loa ngaihtuahna thar hmanga eizawnna kawng an zawn dan tur leh lei tihṭhatna hmanga hlâwk zawka buh leh thlai chin dan inzirtirna, 'Seminar on Innovative Ideas & Best Practice for Rural Working Classes' an buatsaih.

MAHFED chairman C Lalchhunga chuan, kut hnathawktute'n an thil thar chhuah man man zawk leh awmze nei zawka an kalpui theihna awmchhun chu cooperative society a niin a sawi a, "Cooperative society changtlung leh ṭha zawk awm tur chuan kut hnathawktute leh sorkar department-te langtlang leh ṭha zawka an thawhho thiam a ṭul," a ti.

Seminar-ah hian assistant soil chemist Lalengzami'n kut hnathawktute leiṭha an mamawh dante leh leiṭha chi hrang hrang hman dan turte a sawifiah. Kut hnathaktute chuan, an dinchhuah theihna turin society hmanga intelkhawm chu ṭha an tih thu an sawi bawk. Inkhawmah hian leiṭha sem nghal a ni.