Swab sample 16,696 endik tawh

Health Services hnuaia Integrated Diseases Surveillance Programme (IDSP)-in July 12, Pathianni tlai dar 5 thlenga an chhinchhiah danin, Mizoram aṭangin Covid-19 hripui vei leh vei loh endik nan swab sample 16,696 endik a ni tawh.

Mizoram aṭanga swab sample endik tawh dan chu - endikna hmasa ber National Institute of Cholera and Enteric Diseases (NICED), Kolkata-ah panga, Guwahati Medical College-ah 12, Silchar Medical College-ah 41, Zoram Medical College-ah 16,087 leh Lunglei Civil Hospital laboratory (Truenat-PCR)-ah 551 a ni.

Guwahati Medical College-ah March 24 khan Mizorama Covid-19 vei hmasa ber hmuh chhuah a ni a; nimin tlai thleng khan Zoram Medical College-ah mi 219 leh Lunglei Civil Hospital Truenat-PCR hmangin mi 10 hmuh chhuah a ni tawh bawk.

July 12 tlai dar 5 thleng khan Mizoram luhka hrang hranga enfiah (screen) tawh zat chu mi 1,32,265 an ni a, rapid antibody test (RAT) hmanga endik mi 16,628 an awm tawh a ni.