Adviser to CM-in Zophai leh Bairabi a tlawh

Nimin khan adviser to chief minister C Lalramzauva chuan Bairabi Rail Station-a stockyard leh Zophaia IR border out-post a tlawh, Environment & Forest dept. hotute’n an ṭawiawm.

C Lalramzauva chuan Bairabi Rail Station kal­tlanga thing thawnchhuah ṭhin chu Covid-19 hrileng inkharkhipna avangin duh angin kalpui theih a nih rih loh thu sawiin, “Saw Mill Licence pek chhuah a, chak zawk leh hlawk zawka heng kan ram hausaknate hi hman a nih theih nan sorkarin hma a la mek a ni,”  a ti.

Khawtlang hruaitute a kawmnaah C Lalramzauva chuan, “Bairabi hi khaw pawimawh tak, ei leh bar chawk luhna hmunpui a nih piah lamah tun hripui kan hma­chhawn mek kara kan unau lo haw te hmuahna hmun ṭangkai tak a nih,” a ti a, Bairabi khawtlang mipui­te tlawmngaihnaah leh inpeknaah lawmthu a sawi.

Ministry of Environment, Forest & Climate Change, North Eastern Regional office aṭangin Janua­ry leh May, 2020 chhungin rail wagon 588 thawn chhuah phalna hmuh a nih laiin ram puma inkharkhip kalpui a nih tak avangin wagon 254 chiah thawn chhuah hman a ni. Wagon 334 thawn chhuahna hun hi September thla thleng pawh sei leh niin thing tum 1,31,669 bawr vel la awm anga chhut a ni.