Union Cabinet Minister a rawn zin ; Miretheite tan sorkar laipuiin a thawk - Union Minister

Sorkar laipuia Fisheries leh Animal Husbandry and Dairying changtu minister Parshottam Khondabhai Rupala chu June 11 (Inrinni) khan a rawn zin a, sorkar laipuiin miretheite tan hna a thawh thu a sawi.

Parshottam Khondabhai Rupala hian CM banglaah chief minister Zoramthanga kawmin, a ministry chan hnuaia Mizoram kaihhnawih thu pawimawh hrang hrang an sawi dun. Union Minister chuan, a ministry-in mobile veterinary unit a ngaih pawimawh thu sawiin, Mizoramin a dang a neih belhna tur ruahmanna department lamin siam thuai se ṭha a tih thu Chief Minister a hrilh.

Union Minister leh Chief Minister hian Mizoram chu ram dang nen ramri inṭawm a nih avangin ran hri a lo luh awlsam phah dan sawi dunin, Parshottam Khondabhai Rupala chuan, ran hri lêng avanga ran vulhtute harsatna sutkian a awlsam zual theih nan insurance policy leh insurance undertaking hrang hranga sorkar laipui nena hma la tura state-in proposal siam pawimawh a tih thu a sawi.

Inrinni vek khan Union Minister hian Taxation audito­rium-ah hun hmangin, Fisheries minister K Lalrinliana leh AH & Vety minister Dr K Beichhua'n a lo dawngsawng a, Mizoram MP pahnih C Lalrosanga leh K Vanlalvena ten an ṭawiawm.

Parshottam Khondabhai chuan, sorkar laipui chu mi retheite tana thawk an nih thu sawiin, "Mi retheite chawi kân nan scheme hrang hrang siamin, Rs 5,00,000 thleng dawn theihna scheme pawh siam a ni. Mi rethei leh chanhai zawkte'n damdawi man tláwm zawka lei theihna scheme pawh siam a ni a, Covid-19 avanga ram a buai lai pawhin mi harsa zawkte'n ration a thlawna an dawn theihnate siam a ni," a ti.

Sorkar laipuiin a thlawnin Covid vaccine a pek vek theih thu sawiin Union Minister chuan, "Kan ram mipui chauh ni lo, ram dangah pawh thawn chhuah a ni. Infrastructure lamah pawh India hian hma a sawn nasa hle," a ti a, rel hmanga inkalpawhna lamah chak taka hmalak a nih thu a sawi.

Animal Husbandry and Dair­ying Minister chuan, Mizoramin African Swine Fever avanga harsatna an tawhte sutkianna turin Selesiha Vety College chuan laboratory ṭha a neih a ngaih thu a sawi a, proposal ziak turin Mizoram sorkar official-te a hrilh.

Inkhawmah hian Aizawl DC Dr Lalhriatzuali Ralte chuan sorkar scheme hrang hrang - MNGREGA, PMAY, PMUY, PMJDY, PMSvanidhi, PMKKKY, adt. kaltlanga hamṭhatna dawng te'n eizawn­na bul an tan dante leh hlawh­tlinna an neih chungchang a lem nen a sawifiah. AH & Veteri­nary department aiawhte chuan African Swine Fever-in Mizoram a nuai dan leh ASF avanga vawk vulhtu mi tam takin harsatna an tawhte an sawi bawk.