CYMA hruaitute'n contract kan la ngai lo - CYMA President

Central YMA presi­dent R Lalngheta chuan June 11, 2022 khan Silchar YMA-in YMA Day an hman a hmanpui a, CYMA hruai­tute'n contract an lak ngai loh thu a sawi.

R Lalngheta chuan, mi tam takin YMA an dem ṭhin thu sawiin, "Chief Secretary pisa kai tur dan chungchangah pawh nasa taka min dem a, thu dik tawk lo an thehdarh a ni. Contract-te pawh min pek duh an awm ve ṭhin a, Pathian zarah YMA hruaitute hian contract kan la ngai lo. Mi tam takin dem ṭhin mah se, CYMA hruaitute hian kan eizawnna hna ṭheuhah pawh ṭhahnemngai takin kan thawk ṭheuh a ni," a ti.

Hnam insuihkhawm­na chungchang sawiin CYMA President chuan, "Zo fate inpumkhat hi YMA chuan a ngai pawimawh a, Myanmar lama kan unau rawn tlân thlate pawh kan lo kuangkuah zel a ni. Chutih rual chuan, ‘Ruihhlo erawh chu rawn keng suh u’ tiin kan chah," a ti a, ruihhlo bakah HIV positive pung zel do chu hna tling a nih thu a sawi.