Bazarpuia chawhmeh zuarte dinhmun
Aizawl New Market building sak ṭhat avangin chawhmeh zuar eng emaw zat chuan New Market building ṭhiahna hmunah chawhmeh an zuar mek a, awmna hmun hul ṭha an neih loh avangin an chawhmeh zawrh a chhiat nasat phah hle.
Vanglaini palaiin Aizawl New Market ṭhiahna hmuna ṭhu chawhmeh zuarte a kawmnaah chawhmeh zuartute chuan, fûr ruahtui tlâk avangin harsatna hrang hrang an tawh thu an sawi a; awmna hmun hul leh him ṭha an neih loh avangin an thlai zawrh eng emaw zat a chhe tawh a, sum an hloh nasat thu an sawi a ni.
Tarpauline zar hnuaiah
Chawhmeh zuartute chuan, ruah a sûr ṭhin avangin tarpaulin leh mau hmangin bûk an sak chawp thu an sawi a, "Kumin April thla tàwp lama ruah a sûr nasat lai phei kha chuan kan bûk sak hi a chim a, kan thlai dahṭhat eng maw zat a chhiat phah," an ti.
Chawhmeh zawrhna atana bûk an sak chu a phui ṭhat loh thu sawiin, "Bang a nei mumal bawk si lo a, ruah a sûr nasat phei chuan kalkawng leh kan inphona hmunah tui a tling nasa ṭhin khawp mai," an ti a, tui tling chuan an chawhmeh a chîm ṭhin thu an sawi.
Chawhmeh chhia a tam
Ruahtui tlâk tam laia awmna hmun hul ṭha an nei loh avangin chawhmeh a chhiat tam phah thu an sawi a, "Tuiin a tihhuh loh tur chi thlai hnah leh thlai dang chi hrang hrang kan zuar hnem a, ruahsur chánga tuiin kan awmna hmun a chîm ṭhin avangin kan chawhmeh zawrhte a chhe nasa. Ni khata kan phote hi ruahin a nan tawh chuan a tûkah sale loh theih loh a ni tawh ṭhin," an ti.
Phai lam aṭanga thlai an lak luhah pawisa an chawi belh nasat ṭhin thu te, Mizoram chhunga thlai an lâkte zingah pawh dahṭhatna an neih ṭhat loh avangin a chhia leh hralh tlak loh a tam ṭhin thu leh, sum an hloh nasat thute an sawi a ni.
Ṭhutna an indaih lo
Sorkarin New Market building sak ṭhat a nih chhunga awmna tur hmun a siamahte inhralhna an hmuh mumal loh thu Bazarpuia ṭhute chuan an sawi a, "Building hlui ṭhiahnaah hian seat 30 vel a awm a, tunah hian building hluia awm ṭhin mi 300 chuang kan awm bawk," an ti a; Bazarpuia ṭhu ṭhinte in sak ṭhat chhunga ṭhutna/ inzawrhna tur sorkarin a ruahmanah dâwrtu an awm mang loh avangin Bazarpui building ṭhiahna hmunah an inpho a ngaih thu an sawi.
Tuna an inphona hmunah hian seat 30 vel chauh a awm avangin chawlhkar khat danah chawhmeh zuartute chu an inṭhut chhâwk ṭhin thu an sawi a, "Building hluia ṭhu ṭhin mi 300 vel ni mah ila, kum lama upate chu an rawn inpho chhuak lem lo. A inṭhut chhâwk ṭhinte hi thla khatah kar khat vel kan ṭhu hman hrâm a, chhungkaw harsatna avanga ṭhut mamawh tawh mangang tak takte pawh an awm fo," an ti.
Ṭhutna tur an nei dawn lo (?)
New Market building sak mek chu sak chhunzawm zel a nih chuan tuna an inphona hmun chu luah thei loin an awm thuai dawn tih an sawi a, "Ban khur an rawn laih thlen hunah chuan kan insawn ngei a ngai tawh dawn a, Khatlaa kan awmna tur sorkarin a buatsaih hi kan luah a ngai tawh ang," an ti.
Hetih lai hian, Khatlaa sorkarin an awm lailâwkna tur a buatsaihna hmunah chuan customer an awm mumal loh thu te, tunah hian sorkarin bazar kaihhnawih ni lo thil dangah hmantir a tum nia an hriat thu te, ṭhutna ṭha an neih loh avangin an chhungkaw eizawnnain nasa taka a tawrh mek thute leh, an sum lak luh a tlem zel avanga an mangan thute an sawi bawk.