Minister-in YMA Day a hmanpui

Silchar Branch YMA chuan June 11, Inrinni khan YMA Day an lawm a, minister of state Robert Romawia Royte-in a hmanpui. Minister chuan, Silchar Mizoram House-ah hall emaw, tourist facilitation emaw sak nan DPR siamin a sakna sum zawn a nih tur thu a sawi.

Robert Romawia Royte chuan, YMA chu Zo fate ro hlu, khawvel Zo fate suih khawmtu a nih thu a sawi a, "Ṭanpui ngaite ṭanpuiin Mizo hnam tan hma a hruai a, hnung a dâwl tlat bawk," a ti.

Silchar Branch YMA chu damlo leh khualzin mi chi hrang hrang lo mikhuala dâwltu an nih thu sawiin Minister chuan, "In fakawm tak zet a, ṭang zel ang che u. Silchar Mizote ngenna angin Silchar Mizoram House-ah hall emaw tourist facilitation sak chu Mizoram sorkarin a ngai pawimawh a, DPR-te siamin a sakna sum zawn a ni ang," a ti.

Minister chuan, Mizoram sorkarin ṭhenawm state-te nen inkungkaihna ṭha neih a duh thu sawiin, "Silchar leh a chhehvel Zo fate'n in tih tur leh tih loh tur in hre ṭhin hi a lawmawm. Kohhran hrang hrang pastor-te leh missionary-te YMA nen ṭha taka in thawkho hi a ropui," a ti. Silchar Branch YMA leh Silchar MSU hnenah ṭanpuina pawisa a pe nghal a ni.

Khualzahawm Central YMA president R Lalngheta pawhin thu sawiin, YMA-in Zo fate insuihkhawm leh state pawna YMA branch-te a ngai pawimawh tih a sawi a, "Mizo ṭhalai ruihhloin a tihbuai an tam hi a pawi. MSACS hotute sawi danin, tun hnaiah HIV a hluar zel a, ṭhalaite fimkhur a ṭul hle," a ti a; Silchar YMA-te hnathawh dan fakawm a tih thu sawiin, YMA Day chibai bûk nan CYMA hmingin Rs 5,000 a pe.

Silchar Branch YMA president K Vanlalhriata chuan, Silchar-ah kum 1969 hma lamah Mizo welfare a din tawh thu leh chumi hnuah kohhran leh sorkar hotute’n YMA an din thu sawiin, "Silchar YMA hian harsatna tâwk mi mangangte ṭanpuiin theihtâwpin hma kan la ve a, variety takin rawng kan bawl a ni," a ti.

Silchar-ah fimkhur ngaihna bik tak tak a awm ṭhin thu sawiin Silchar YMA President chuan, "Silchar-ah hian YMA chuan hmun dang aṭanga rawn kal Mizote kan dawngsawng thei reng a, chutih rual chuan Mizo tihmingchhe zawnga rawn awm lo turin kan ngen a ni,” a ti a, YMA Day June 15 chu Assam sorkar chawlh a nih loh vanga a hun sawn an nih thu a sawi bawk.