Ni hnih chhungin hripui vei 61 hmuh chhuah a ni

Mizoramah Covid-19 vei June 10, Zirtawpni khan mi 33 leh June 11, Inrinni khan mi 28 hmuh belh a ni. Inrinni khan mi 12 leh nimin khan mi pahnih chhuahtir an ni a; hripui vangin nimin khan mi pakhat a thi.

June 10, Zirtawpni khan sample 225 endik aṭangin Covid-19 positive mipa 15 leh hmeichhia 18 hmuh chhuah an ni a; RAT hmanga hmuh vek niin, positivity rate 14.67% a ni.

Inrinni khan sample 209 endik aṭangin Covid-19 vei hmuh thar mipa 13 leh hmeichhia 15 an awm a; RAT hmanga hmuh chhuah vek niin, positivity rate 13.39% a ni.

Lallianzuali (thla 3), Lungsen, Lunglei distict chu nimin chawhnu dar 2:30 khan Covid-19 vangin Lunglei Dedicated Covid Health Centre-ah a thi a, natna dang nei tel a ni.

IDSP record angin, Mizoramah Covid-19 vei 2,28,573 hmuh chhuah a ni tawh a, mipa 1,06,417 leh hmeichhia 1,22,156 an ni a, mipa aiin hmeichhia 15,739-in an tam zawk. Nimin tlai dar 5 thleng khan mi 2,27,706 (99.62%) chhuahtir tawh an ni a, mi 701 (0.31%) thi tawhin, enkawl mek mi 166 (0.07%) an awm. Nimin tlai dinhmun angin, Mizoramah hripui vei enkawl lai tamna ber Saitual district-ah mi 52 an awm a, district pathum - Siaha, Champhai, Lawngtlai leh Hnahthial district-ah hripui vei an awm tawh rih lo.