Zirlai pass tharte lawmpuina hun hmang

Tlungvel Higher Secondary School chuan June 11, Inrinni khan HSSLC 2022-a an zirlai zawng zawng an pass lawmna an hmang a, deputy speaker Lalrinawma, MLA-in a hmanpui.

Lalrinawma chuan, Tlungvel HSS thawktute leh zirlai hlawhtling thar zawng zawngte a lawmpui thu a sawi a, ”Zirna pawmawhzia hriain hma lam pan zel ang che u. In nungchang uluk ula, zirlai tih atana mawi leh mawi lo thliar hrang thiamin, tum mumal neiin bei sauh sauh ang che u,” a ti a, an kal zelna turah duhsakna a hlan.

Tlungvel Higher Secondary School hian an din tirh ata HSSLC exam vawi 12 an hmachhawn tawh a, 100% pass result ṭum riat an nei tawh a ni.

Thingdawl khuaah pawh June 10, 2022 khan zirlai ti ṭhate chawimawina hun buatsaih niin, khuallian bialtu MLA K Laldawngliana chuan Mizoram chu Pathian ṭihna nena zirna aṭanga siamṭhat theih a la nih thu sawiin, tum mumal tak nei chunga rinawm leh taima tak a central service thleng ni thei turin zirlaite a chah.