Champhai district-ah ASF vanga Vawk thi leh suat a tam ber

Vawk pùl hri, African Swine Fever (ASF) vangin kumin 2022-ah Mizorama khua/veng 68-ah vawk 4,848 a thi tawh a, vawk pùl hri hi a darh zau zel. Champhai district-ah ASF hri lenna hmun, ASF vanga vawk thi leh suat a tam ber.

June 12, nimin thleng khan district pakua - Aizawl, Lunglei, Champhai, Kolasib, Serchhip, Mamit, Saitual, Khawzawl leh Hnahthial district-a khua/veng 68-ah ASF a léng tih finfiah a ni tawh a, heng khua/veng 68-ah hian vawk 3,829 suat a ni tawh.

District pakuaa vawk hri lenna hmun 68 zinga 23 chu Champhai district a mi an ni a; Champhai district-ah hian ASF vangin vawk 2,523 thi tawhin, kumin chhunga ASF vanga Mizoram puma vawk thi 4,848 aṭangin 52.04% a ni a, vawk suat tawh zawng zawng 3,829 aṭangin Champhai district-a vawk suat zat 2,727 chu 71.21% a ni bawk.

Champhai district-a Farkawn khuaah ASF vanga vawk thi leh suat a tam ber a, vawk 751 thi tawhin AH&Vety department hriatpuinain vawk 1,507 suat a ni tawh. Kolasib leh Saitual district-ah ASF hri lenna khua/veng paruk ve ve awm tawhin vawk suat an la awm lo thung a, ASF lenna district pakua zinga vawk suat la awm lohna hmun an ni.

Aizawl, Champhai, Kolasib, Serchhip, Mamit, Saitual leh Khawzawl district-ahte ASF lenna hmun nia rinhlelh, la finfiah loh khua/veng 36 a awm mek a, he'ng khua/ vengahte hian vawk 641 a thi tawh a, sample endik mek an ni.

ASF lênna hmunah vawk 3,829 suat a ni a, ASF rinhlehna hmuna vawk suat 641 nen a vaiin Mizoram pumah ASF kaihhnawihin vawk 4,077 suat a ni tawh.