FCI kudamah buhfai uih a thleng

Ruahsur nasa avanga inkalpawhna kawng a chhiat hnuah Food Corporation of India (FCI) chuan Mizoramah buhfai harsatna a awm lohna turin hma an la mek zel. Hetih lai hian, tun hnaia Bairabi kaltlanga buhfai rawn lut tam tak chu a rimchhiat/uih avangin thenfai mek a ni a, buhfai chhe man chu FCI chuan Railways thuneitute hnenah pawisa chawitir an tum.

Mizoram tana buhfai rimchhia/uih thleng chungchang ngaihven hian nimin khan thuthar thehdarhtu ṭhenkhatte'n Rengtekawna FCI kudam an tlawh. Press mite zawhna chhangin kudam enkawltute chuan, Rengtekawnah buhfai thleng tura beisei truck trip 23 a nih thu leh chu'ng zinga 17 chu an dawng tawh tih an sawi a, "Kolasib ang bawkin Mizoram FCI kudam hrang hrangah buhfai chhia hi a thleng a, heng a thlenna hmunahte hian hralhchhuah hmain a thenfai hna thawh mek a ni," an ti.

FCI hotute chuan, buhfai uih chhan chu Railways lam fimkhur loh vang niin an sawi a, "Railways-in an bungraw phurhte hi him taka thlen tur a nih laiin buhfai phurhna wagon-te ruah lakah a him tawk lo a ni. Buhfai zawng zawng hi enfiah vek a ni dawn a, heta ṭang hian a chhe zat Railways hotute hriattir an ni ang, a chhe zat hu pawisa chawitir an ni ang," an ti.