Khawzawl VC-in inkhawmpui an hmang

Khawzawl District Village Council Association General Assembly hmasa ber chu June 10, Zirtawpni khan Khawzawl Vengthar YMA Hall-ah neih a ni a, district bawrhsap CC Lalchhuangkima’n a hmanpui.

CC Lalchhungkima chuan, VC kal khawmte chu an khaw tana hma an lakna turah ruahmanna felfai tak siamsa turin a chah a, ”Ruahmanna in siam dan azirin department hrang hrang hotute in dawr ang a, hun remchang a awm hunah in plan hmangin hma in la thei dawn. Tun hnaiah ruihhlo a pung nasa a, ruihhlo man a tlawm a, a hmaa ti phak loa inngai ṭhalaite’n an ti nasa,” a ti a, mahni khua ṭheuh dinhmun zir chianga ruihhlo laka him dan ngaihtuah turin a chah.

Heroin (No.4)-ah ṭhalaite an tluk luh laklawh chuan an tho leh thei tawh mai mai lo tih sawiin Bawrhsap chuan, ”Hei hian khawtlang a nghawng a, rei vak loah phei chuan rukrukin a zui ṭhin. Khawtlang a dam a, district a him leh zual theih nan VC-te in ṭan rual a ngai a, ruihhlo do hi ṭangruala thil tih ngai a ni,” a ti a; ruihhlo chuan ram leh hnam hnuk a khawih avangin thawhhona ṭha neih a pawimawh thu a sawi.

Khawzawl District VC Association General Assembly-ah hian Khawzawl district-a VC 38 aṭangin VC 34 an tel a, member 120 vel an awm a ni.