AMRUT scheme hnuaia hnathawh enfiah

Minister of state Lalruatkima, Aizawl West II bialtu MLA ni bawk chuan June 11, Inrinni khan a bial chhunga AMRUT scheme hnuaia tui luankawr siam hna thawh mek a enfiah. Minister chuan, Kanan Veng chhunga kawngpui nêka tuihawk luankawr siam mek chu PWD department hotute hnenah siamṭha leh turin a ngen.

Lalruatkima chuan, a bial chhunga hnathawh mek chu nakin zela mipuiin an hman tur a nih avangin a siam dan phungah mipui tana ṭha tura zau zawka siam ṭul a tih thu a sawi a; Kanan Veng chhung kawngsira PWD-in an siam mek chuan kawngpui a nêk avangin siamṭha leh turin a ngen a ni.

AMRUT scheme hnuaia Aizawl khawpui kawngpui sir tuihawk luankawr siam mek hi package thumah ṭhen a ni a, a siamna turin cheng vbc 12.99 ruahman a ni. Contractor turin R Lalhnuna, C Lalhluna leh Lalsawmliana te thlan an ni a, tun dinhmunah package khatnaah 65%, package hnihnaah 55% leh package thumnaah 90% an thawk zo tawh a ni.