KHAWTHLIR

Sialsuk doctor Chhui zo tawh
Damlo chunga dik lo taka chea puh Dr Linda Lalbiaknungi, Sialsuk Primary Health Centre (PHC)-a medical officer chet dan chhui chiang tura ruat Aibawk BDO chuan a chhui zo tawh a, a thil hmuhte sorkarah a thehlut tawh. Dr Linda Lalbiaknungi hian damdawi-in canteen-ah Rs 1,000 a ti bo a, pawisa rutu-ah Sialsuk damdawi-ina damlo enkawl lai Lalrengpuia chu puhin, May 12, 2022 khan damdawi-in aṭangin a hnawt chhuaka puh a ni a; Lalrengpuia chu May 13, 2022 zanah a thi a ni.

Thisen pe
June 11, Inrinni khan KṬP, Leitan Pastor Bial chuan Synod Hospital tan thisen unit 49 an pe a, petute mipa 44 leh hmeichhia panga an ni. Falkawn Branch YMA pawhin ZMC blood bank-ah thisen unit 46 an pe a, petute mipa 32 leh hmeichhia 14 an ni.

Din champha lawm
Zotrek Adventure Club chuan June 10, Zirtawpni khan Central YMA Hall-ah an din champha kum 10-na an lawm a, AMC executive councillor Laltlanzova Khiangte-in a hmanpui. Inkhawmah hian hruaitu hlui chawimawina leh an member thite sûnna hunte an hmang.

MLA-in enfiah
Aizawl West-II bialtu MLA Lalruatkima chuan June 11, Inrinni khan a bial chhung Dawrpui Vengthara MLA fund hmanga hnathawhte a enfiah a, hna thawktute chu tlo leh rintlaka hna thawk turin a chah.

Culvert hawng
Aizawl South-I bialtu MLA C Lalsawivunga chuan June 11, Inrinni khan Republic Venga Sumi lane-ah MLA fund aṭanga siam culvert siam a hawng. Culvert siamna atan hian Rs. 18,90,000 hman a ni a, ft. 17-a zau leh ft. 60-a thui a ni. Mi parukin culvert siamna atan a thlawnin an ram an pe a ni.

Heroin man
Champhai Police-te chuan June 10, 2022 zan dar 10:30 khan Khankawn Police checkgate-ah Elvy Lallawmawmi (24) d/o Lalramliana, Chawlhhmun, Aizawl, Zokhawthara cheng mek hnen aṭangin heroin gram 125 an man. Heroin hi cheng nuai 62.5 man a ni.