Zirtirtute'n CM bangla an luhchilh Police-in Hindi zirtirtu mi 23 an man

Chief Minister's Office (CMO) leh bangla luhna gate bula chaw nghei, CSS hnuaia Hindi zirtirtute chuan March 28, Thawhlehni zan dar 8:30 vel khan CM bangla an luhchilh a, bangla páwnah an pungkhawm. Hetih lai hian, nimin zing khan CSS Hindi zirtirtu zinga mi 23 man an ni.

Mizoram CSS Hindi Teachers Association (MCHTA) hruaitute chuan, an member chaw nghei mek zingah damlo na tak, thih mai hlauhthawnawm a awm avangin ambulance an ko a, doctor an awm loh thu an sawi avang leh ambulance tirh a nih mai loh avanga thinrimin CM bangla chu an luhchilh ta niin an sawi a, "CM bangla-a tharum hmanga chêt tumna kan nei lo," an ti.

Hindi zirtirtute'n CM bangla an luhchilh dawn lai hian venhimna lama duty an awm tam tâwk loa a, security duty-te'n lo dang mah se, an tam hneh avangin duty-te chu an paltlang.

Mi ṭhenkhatin main gate an paltlang laiin ṭhenkhat chu gate pakhat zawkah an láwn liam a, CM bangla bula gate chu chhung lam aṭanga hawngin, main gate aṭang lutte pawh bangla kawt an thleng a ni.

CM bangla-ah hian police hotute an thleng thuai a; police hotute chuan Hindi zirtirtute chu chaw an ngheina lama an chhukthlak loh chuan tharum hmanga nawr an nih tur thu an hrilh. CM bangla tuala darkar chanve vel an awm hnuah zirtirtute chu chaw an ngheina lamah an chhukthla leh a ni.

CM bangla-a chengte chuan, bangla (building) kawngkapui ber chu chhung lamah an kalh hman a, Hindi zirtirtute hian kawngkapui chu hawn tumin an sâwi a, mahse, an hawng thei ta lo niin an sawi.

CM bangla tuala innawrnaah Hindi zirtirtute zinga hliam tenau tuar an awm nual a, chu'ng zinga mi pahnih chu CM bangla tual aṭangin damdawi-inah lak nghal an ni.

Chaw nghei rei tawh vanga taksa chau tawh pawh eng emaw zat an awm a, chung mite chu Thawhlehni zan hian Aizawl Civil Hospital (ACH) medical superintendent Dr KL Remsanga hoin an vil a, mi eng emaw zat chu Thawhlehni zan hian ACH-ah lak leh an ni.

Thawhlehni zan vêk khan Zarkawt Joint Action Committee hruaitute'n CM bangla-ah thuthar thehdarhtu ṭhenkhatte an kâwm a. Zarkawt Local Council chairman Lalzamliana chuan, Hindi zirtirtute thil phût chu an hriatthiampui a, an khawngaih em em rualin, an tam tham avangin a bul hnaia mipuite'n harsatna an tâwk a, veng mipui aṭanga complaint a awm avangin chaw an ngheina hmun chu sawn turin an lo ngen tawh tih a sawi.

CSS Hindi zirtirtute chaw ngheina hmun huam turin Aizawl district magistrate Kannan Gopinathan chuan nimin zing khan Code of Criminal Procedure, 1973 Section 144 tlawhchhanin Zarkawt Traffic Point leh Hrangbana College (MacDonald Hill leh a chhehvel) inkarah mi panga aia tam awm khawm, vantlang inkhawm, chaw ngheia nawrh leh lungawi lohna lantirte khapna thupek a chhuah.

Khapna thupek hi nimin zing dar 7 aṭanga thla hnih chhung hman tur a ni a; thupek chhuah a nih tak avang hian police-te chuan Hindi zirtirtute chu ṭîn darh turin an ti a, a tam zawk chu an ṭin darh.

Nimin zing dar 8 vel khan police-te chuan Teachers Inn-a awm Hindi zirtirtu mi 23 chu an man a, Aizawl PS-ah an hruai nghal. Mi an mante hi mipa 15 leh hmeichhia pariat an ni a, an zingah MCHTA president Lalchunglura bakah office bearer dang paruk an tel.

CSS Hindi zirtirtute hi nimin chawhma dar 11 vel aṭang khan Aizawl PS thlang kawngpuiah an kal khawm leh a, an member-pui leh hruaitu, police-in an mante chu chhuah turin an phût. Hei vang hian MCHTA hruaitute leh Aizawl SP Lalhuliana Fanai leh police hotu dangte chu an inbia a, thutlukna mumal an siam lo.

Police hotute chuan, an mi man chhuah chu an thuneihna piah lam a nih avangin, sorkar thu thuah an innghah thu an sawi. He thu ziah lai hian Hindi zirtirtu, Aizawl PS thlanga awm khawmte chu an ṭîndarh tawh a, police-in an mante erawh chu chhuah an la ni lo.