CSS Hindi zirtirtute chêt dan Vanduaithlak ka ti - CM Hawla

Chief minister Lal Thanhawla chuan, March 28, 2017 zana CSS Hindi zirtirtute chêt dan chu vanduaithlak a tih thu a sawi.

Nimin Assembly session-ah chief minister Lal Thanhawla chuan, CSS Hindi zirtirtute chu sorkarin a thlahthlam lo a, a ngaihtuah reng tih sawiin, "Ngaihtuah reng an nih laia hetianga an che hi a pawi a, a vanduaithlak. Tu pawh sorkar se zirtirtu tlak an ni em tih en tur niin ka hria," a ti a; sorkar laipui chhawr an nih avangin hlawh an lak lohah pawh state-in mawhphur vak lo mah se, inhriatthiamna avangin advance tea an pek thu a sawi.

Lal Thanhawla chuan, CSS Hindi zirtirtute chu kum tin a thara contract pek leh bond sign tir ṭhin a nih thu sawiin, "CSS hnuaia chhawrte hi chuan an hun a tawp chuan mai-pár-thlawn tur an ni tih an inhria. CSS hnuaia thawk, an term tawp tawh an awm nual a, an bond sign an zah a, ṭha takin an awm mai ṭhin. Hindi zirtirtute hian tam tham an inti nge, 'tianga an awm. Hlawk pek leh tum an nih laiin tiang hi a thleng a, pawi ka ti," a ti.

Chief Minister sawi danin, Hindi zirtirtute'n Thawhlehni zana CMO gate leh CM bangla gate patlanga CM bangla tuala an punkhawmnaah MNF ṭhalai president K Vanlalvena leh Mission Veng local council-a MNF member Francis Lalrammuana te pawh an awm ve a ni.

Hindi zirtirtu chhawr chu Mizo­ramin a hlâwkpui dan chungchang sorkar laipui aṭanga zir chiangtute an beidawng hle. Chuti chung chuan evaluation rawn tih leh turah Hindi zirtirtute an duhsak hle a, an lo kal turah pawh sikul thlan bik nei a, Hindi thiam deuhte dah turtein School Education Minister an hrilh a ni.

School Education minister H Rohluna pawhin CSS Hindi zirtirtute chu an ngaihsak thu sawiin, "Central lamah chhawr zui an nih theihna atan theihtawp kan chhuah a, tun hi kan thlen chin a ni hrih. Third party evaluation tih phawt tur a ni a, information ṭulte an dawn hunah an lo kal ang," a ti a; Hindi zirtirtute chhawr zui an nih theihna atan sorkar bakah Central YMA, MZP leh MSU-te pawhin Prime Minister hnenah lehkha an thawn tih a sawi.

MNF member Lalruatkima zawhna chhangin H Rohluna chuan, CSS hnuaia hna thawk reng rengte chu an hun a tawp hunah state buaipui turin sorkar laipuiin a tih ṭhin thu a sawiia, "State-in a tih theih miau loh chuan tih ngaihna a awm lo," a ti.

H Rohluna tarlan danin, Mizo­ramah Hindi zirtirtu middle school-ah 964 leh high school-ah 435 mamawh a ni. CSS Hindi zirtirtute chu M/S-ah mi 916 leh H/S-ah 389, an vaiin mi 1,305 an awm a; Hindi zirtirtu thawk nghet M/S-ah 487 leh H/S-ah mi 309 an awm bawk.

Language teacher hi Nagaland, Punjab leh Orissa-ahte pawh an awm ve a, Punjab-ah mi 14 leh Orissa-ah mi 18 an awm. Nagaland chuan Mizoram aiin an tam a, dah ngheh phûtin an nuar ve tho a ni.

Kum 2017-a M/S leh H/S-ah Hindi subject chu exam tir an nih thu sawiin Education Minister chuan, "A theih ang angin Hindi zirtirtute pawt khawmin exam buatsaih a ni," a ti a; school session tharah pawh a theih ang anga Hindi subject chu kalpui tur a nih thu House a hrilh.