SA-te HIV/AIDS chungchang zirtir

Mizoram State AIDS Control Society (MSACS) chuan, nimin khan Aizawl Temple-a Booth Mansion-ah Salvation Army home league-te pualin HIV/AIDS chungchang zirna an buatsaih.

Training-a hunserh hmangtu, Territorial co­mmander Com. Lalngaih­awmi chuan, kum 1989 aṭangin Salvation Army-te'n HIV/AIDS lam hawia hma an lak ṭan thu leh HIV/AIDS lam hawia hma la hmasa bertu nia an inhriat thu a sawi a, "A ṭul anga hmalak zel kan inhuam a ni," a ti.

MSACS project direc­tor Dr Lalmalsawmi Sailo chuan, HIV-in Mizorama bu a khuar ngheh mek zel avangin, mimal leh khawtlang nun kaihruaitu ṭha berte zinga mi kohhranin HIV darh zel tur venna kawngah awmze nei leh kalphung fel tak neia hma an lak a hun tawh thu a sawi a, "Kohhrana rawngbawltute'n HIV/AIDS do hi kan mimal mawhphurna a ni tih kan hriat a hun tawh a ni," a ti.

Training-ah hian HIV/ AIDS bakah, fanau enkawl dan leh chhungkaw ṭha chungchangte zirho a ni.

MSACS hian March 22, 2017 khan UPC (NEI) hnuaia hmeichhe pawl, Ladies Auxiliary Department-te pualin ni khat awh HIV/AIDS chungchang zirhona an lo buatsaih tawh a; kum 2015 khan Mizoram puma Presbyterian Kohhran hmeichhiate pualin chawlh­kar khat awh training an lo buatsaih tawh bawk.