KHAWTHLIR

Punkhawm khap
Aizawl SDO (Sadar) chuan thupek chhuahin, Assembly session neih mekah harsatna a awm lohna atan Taxation commissionerate aṭanga Vanapa Hall area, Treasury Square aṭanga Raj Bhavan chhim lam gate inkarah vantlang, politics, sakhuana leh thil dang vanga punkhawm a khap. Thupek hian thla hnih a huam ang.

Sàwmna beihpui
PRISM chuan Mizoramah rorelna dik leh sorkar ṭha a awm theihna tura mipuite thawhhopuia sawmna, '‘Sawmna beihpui’ tia an vuah thawh khatna chu nimin khan Treasury Square-ah an hawng. Hawnna inkhawm zawhah Treasury Square, Khatla leh Sikulpuikawnahte thuziak an sem a, vawiinah an chhunzawm leh ang.

Thisen pe
T Romana College chuan, silver jubilee an lawmna kal zelah nimin khan Republic Vengthlanga an campus tharah blood donation camp an huaihawt a, mipa 127 leh hmeichhia 44-te'n Aizawl Civil Hospital tan thisen unit 171 an pe.

Hnawhkhat dawn lo
GAD changtu chief minister Lal Thanhawla chuan INC member Dr Ngurdingliana zawhna chhangin, GAD Civil Aviation Wing-a Principal Consultant post chu hnawhkhah tumna a awm rih loh thu a sawi a, "He post hi temporary post chauh a ni," a ti.

Study Centre hawng
Lungleia J Buana College leh National Institute of Electronic & Information Technology ṭangkawpin, J Buana College-a Computer Study Centre (CSC) an din chu nimin khan DC Lalzarmawii'n a hawng. CSC-ah hian CCC course zir a ni a, tunah hian zirlai 90 awmin, a thlawn vekin zirtirna pek a ni.

MPYCC lawm
Congress party ṭhalaite chuan, doctor indaih lohna phuhrûkna turin sorkarin doctor 26 lak a phalsak thu March 20, 2017-ah Health minister Lal Thanzara'n Assembly House a hrilh tih an tarlang a, "Health Minister chak leh mipui mamawh ngaihtuahsaktu kan nei hi lawmawm kan ti hle," an ti.