ITI zirlaite'n lungawi loin zirna an chawlhsan

Aizawla Industrial Training Institute (ITI)-a zirlaite chuan ITI Trainees Union huaihawtin nimin aṭang khan an zirlai an chawlhsan rih. An chawlh chhan hi an mamawh hrang hrangte tihhlawhtlin a nih loh vang leh an chanvo tur an chan loh vanga zir chhunzawm zelna tlaka an ngaih loh vang a ni.

ITI Trainees Union (ITITU) chuan thu­chhuah siamin, "Kan zirna kawnga harsatna hrang hrang kan tawh, hotute hnena vawi tam tak kan thlen tawhte tun thlenga a hlawh­tlinna kan la hmu lo hi pawi kan a, zirlaite ngaihthahna lian takah kan ngai," an ti.

ITITU tarlan danin, October 2016 tàwp aṭanga tun thlengin bus a la service lo a, bus tlan loh chhan chu diesel awm loh vang a ni. Bus pahnih nei tur an ni a, pakhat chauh an nei. Boys Hostel chu July 14, 2016-ah hawn a ni a, mahse, kawlphetha, tui leh thil dang tam tak a la awm loh avangin tun thlengin luah theih a la ni lo; chutih laiin, tuna an awm mekna hostel chu a chhe tawh hle a ni.

Motor Mechanic Vehicle (MMV) junior hoin classroom an nei lo a, trade dang zawng zawngte inzirna tur hmanrua (tools and equipments) a awm ṭha lo. Kum hmasa lamahte result hmu lo tam tak an awm a, "Zirlaite'n kan zirna tura kan mamawh kan neih tur kan thlente ngaihsak a ni ngai lo," an ti.

An Principal chu LEIT department-ah deputy director-ah a kaisang tawh chungin, ITI la hmui tura tih a ni tih sawiin, "Hmuitu ringawta principal neih hi ṭha kan ti lo," an ti a; principal thar pe vat turin sorkar an ngen.

Auto Electrical Engineering (AEE) zirte'n practical tihna tur mamawh ang motor lei loin, mamawh phuhru pha lo Nano car lei a ni tih sawiin, "Practical tihna tur tun thlengin motor an la nei lo. Zirna atana tlak ngei motor neih vat kan phût," an ti a; Nano car chu Principal-in a hmang mek niin an sawi.

Instructor an indaih loh hle thu sawiin, "Office staff ṭhenkhatte appoint chawpa chhawr ṭhin an ni tih sawiin, "Instructor pakhatin trade pathumte enkawl an nei a, an indaih lo mai ni loin, an zirtir loh tawp tur min zirtir fo," an ti a; instructor post hrang hrang ruakah qualified instructor ngei dah turin sorkar an phût a ni.