Mizo zirlaite kutthlaktu hrem phût

Chakma-te'n Tlabunga Mizo zirlaite kut an thlak duh lohna leh kutthlaktute na taka hrem phûtin, Lunglei MZP chuan nimin khan Lunglei Bazar Veng leh DC pisa kawtah inkhawm an buatsaih. Bazar Vengah hun hmang hmasain, chumi hnuah DC pisa an pan leh a ni.

Lunglei MZP president Benjamin Vanlalfela chuan, tun hnaiah Chakma an pung chak a, ram leilung fate pawi an khawih zing ta hle nia sawiin, "Tlabunga kan zirlaipui, kumtluana an inbuatsaih chhan, an exam mek laia exam pawh an hmachhawn chhunzawm ṭha hleithei lo a ni," a ti a; thil thleng chu hnam anga ṭanrual a ngaihzia mipui hriattirtu ni se a duh thu a sawi.

Zirna kawngah ram leilung fa anga inchhálin Chakma-te'n Mizorama Zofate chanvo an chuhpui nia sawiin Benjamin Vanlalfela chuan, "Dâwt tinréngin min hêk a, Mizo an nih miau loh avangin kan chanvo ang an chan ve zel hi MZP chuan a phal ngai dawn lo," a ti.

Tlabunga Mizo zirlai kutthlaktute hi nimin khan an chungthu Court-ah ngaihtuah a ni a, bail an dilna hnâwl a ni. Police lamin chargesheet an la peih loh avangin convict an nih dawn leh dawn loh rel a la ni lo.