Lîrnghîng tuar thlamuantute'n DC an kâwm
Mizoram khawchhak lam, Champhai district-a lirnghing vanga thlabár taka awmte thlamuan tura kal Psychological Support & Guidance Team-te chuan an tih turte an ti zo a, nimin khan Champhai DC Maria CT Zuali hnenah report pein, DC conference hall-ah an inkâwm nghal. Psychologist-te thil hmuh dan tlangpui leh hmalak theih dan turte sawiho a ni.
Champhai Bawrhsap chuan, lirnghing tuartu khaw hrang hrangte a ṭul anga tlawh kuala thlabár taka awmte thlamuantu Psychological Support & Guidance team chungah lawmthu sawiin, "In thil tih hian mipui chauh ni lo, official-te thleng pawhin chakna leh phûrna a pe a ni. Mithiam tak takte’n in zir thiamna a tak ngeia in hmang chhuak hian rah ṭha a chhuah ngei ka beisei," a ti.
Lirnghing leh chhiatna a thlen palha hmalak dan tur inzirtirna zau zawk kalpui turin ruahmanna siam a nih thu sawiin Maria CT Zuali chuan, "In sak dan dik leh him bakah, sakna hmun leh hmanraw ṭha zawk thlan kawngah inzirtir tum a ni," a ti a; rilru lama harsatna neite tana ràwn theih turte ngaihtuah a nih tur thu a sawi.
Team leader Prof. Zokaitluangi chuan, an thil hmuh leh zirbingna aṭanga an hriat tlangpui a sawi a, "Lirnghing vanga rilru lama ṭanpui ngaite ṭanpuina pe tura sorkar tirh kan ni. July 9, 2020 aṭangin team pasariha inṭhenin, khaw 31 tlawh a ni a, psychological screening neih niin, a ṭul anga ṭanpui ṭhin a ni," a ti.
Harsatna neite a mal mala an kawm ṭhin thu sawiin Prof. Zokaitluangi chuan, "A êng lam záwnga thil thlir thiam tur leh thuthang nazawng awih lo tura infuihin, inkaihhruainate kan kawhhmuh ṭhin," a ti a; khawtlang hruaitu, YMA, tlawmngai pawl dangte leh hlauthâwng leh thlabár chung chunga an hun buatsaih chhimtute chungah thinlung taka an lawm thu a sawi.