Ram kaihhnawih dan thar tur LRS Minister hoa sawiho a ni

Land Revenue & Settlement (LRS) minister Lalruatkima hoin nimin khan a pisaah 'The Draft Mizoram Underground Pipeline (Acquisition of Right of use in Land) Act, 2022' chungchang thlirho a ni a, siamṭhat ngai laite sawiho a ni.

The Draft Mizoram Underground Pipeline (Acquisition of Right of use in Land) Act, 2022 hian sorkar laipuiin Indradhanush Gas Grid Limited kaltlanga tui, gas leh tui chhe kalna tur te, thil siamna hmun aṭanga bawlhhlawh kal dan tur leh chumi atana pipeline siam dan tur te, sorkarin pipe kalna tur mimal ram a lak dan te, electric line leh communication signal line-te lei chhunga pipeline anga kaltir a nih dawn pawha ram ruahman dan tur chungchang ruahmannate a huam a ni.

Mizoram sorkar pawhin hlawhtling taka Indradhanush Gas Grid kalpui a nih theih nan dan mumal tak nei turin hma a la mek tih sorkar thuchhuah chuan a tarlang.

Mizoram Underground Pipeline (Acquisition of Right of use in Land) Act, 2022-in a tum ber chu, pipeline kaltir a nih dawnah mimal ram lâk a ngaih pawha ram pumpuia laksak ngawt ni lo a, pipeline kalna tur bik mimal ram hman tura ruahman dan (Right of Use) a huam tel a ni.