Union minister Rupala-a'n Mamit a tlawh

Fisheries, Animal Husbandry & Dairying minister Parshottam Rupala chuan nimin khan Mamit DC Conference Hall-ah Mamit khawpuia sorkar officer-te leh sorkar laipui scheme hrang hranga hamṭhatna dawngtute a kâwm.

Parshottam Rupala chuan, Mamit district a tlawh chhan sawiin, cen­tral scheme hrang hrang Mamit district mipui­te'n an hlawhtlinpui theih nan leh ṭha taka kalpui a nih leh nih loh enfiah a, harsatna awmte sutkianpui tura kal a nih thu a sawi a; sorkar hmalakna hrang hrang zir chiang a, ṭanpui­na dawngtute'n an hlawhtlinpui ngei theih nan ṭan la turin sorkar officer-te a fuih.

Mamit district chu Aspirational District a nih angin natna khirhkhân bik inenkawlna atan Rs 5,00,000 thleng bill theih turin central-in a ruahman thu sawiin Rupala chuan, "Mamit district-ah mi 50,000 thlan tur aṭanga 30,000-te chu dawng tura thlan an ni tawh a, a bak 20,000 pawhin an hmuh theih nan hmalakpui mek a ni," a ti.

Union Minister chuan, PM-Kisan chu Aadhaar card, ram leh bank account nei tan dil theih a nih thu sawiin, kut hnathawktute'n PM-Kisan aṭanga hlâwkna an dawn theih nana ṭan la turin a kaihhnawih sorkar department leh officer-te a chah a; sorkar official-te leh puihna dawngtute'n harsatna leh mamawh an thlente chu bawhzui a tum thu a sawi bawk.

Inkawmhona hi Mamit bawrhsap Lalnunhlua'n a kaihruai a, Aizawl aṭangin Fisheries Director leh official-te'n an ṭawiawm a; Aspirational District hnuaia hmalaknate Aspirational District nodal officer Lalsanglura'n a sawifiah.

Central scheme - AYUSHMAN BHARAT - Health & Wellness, Ayushman Bharat - Jan Arogya Yojana, e-Transaction, Pradhan Mantri Jan Dhan Yojana, PM Street Vendor's Atma Nirbhar nidhi, Pradhan Mantri Ujjwala Yojana, Pradhan Mantri Awas Yojana, Jal Jeevan Mission, Swachh Bharat Mission, PMMVY leh PM-Kisan chungchangte sawiho a ni.

Parshottam Rupala hian June 12, Pathianni khan Central Agricultural University (CAU) hnuaia College of Veterinary Sciences & Animal Husbandry, Selesiha PG Boys Hostel-II sak thar a hawng. Minister chuan, ran vulh chu eizawnna ṭha a ni tih sawiin, hlâwk zawka mipuiin ran vulh an buaipui theih nan scheme hrang hrangte chu ṭangkai taka hmang turin ran vulhtute a chah.