Kumin chhungin Champhai dist-ah Heroin gram 12,260.500 man tawh

NDPS Act hnuaiah hian nimin thleng khan Champhai district police-te'n heroin gram 6,381 leh methamphetamine mûm 10,000 an man tawh a, thubuai 34 an ziak lut tawh a ni. Ruihhlo kaihhnawihah mi 39 man an ni a, chu'ng zinga pariat chu ram dang mi an ni.

Champhaia Excise & Narcotic department pawhin heroin gram 5,128.300, meth mûm 80,000 leh ganja kg. 534.500 an man tawh a, thubuai 43 an ziak lut. Mi 48 an man a, mi pahnih chu ram dang mi an ni. Custom Preventive Force, Champhai pawhin heroin gram 751.200 leh a kaihhnawihah ram dang mi pakhat an man tawh bawk.

Kumina Champhai district-a NDPS Act hnuaia man tawh zawng zawngah thubuai 78 ziah luh a ni a, mi 88 man niin, an zinga 11 chu ram dang mi an ni.

Heroin man zawng zawng chu gram 12,260.500 niin, tualchhung market-a a hlut zawng chu cheng nuai 282.90 hû leh international market-a a hlut zawng chu cheng nuai 6,130.25 hû a ni. Meth man tawh mûm 90,000 chu cheng nuai 180 hû a ni a, ganja man tawh kg. 534.500 chu a hlut zawng cheng nuai 16.03 a ni.

Champhaia de-addiction & rehabilitation centre parukah mipa 284 leh hmeichhia 36, an vaiin mi 320 an awm mek tih tarlan a ni bawk.