Ngaihtuahna séng turin mipui sáwm

Aizawl South-I bialtu MLA C Lalsawivunga chuan, Mizoram mipuiin roreltu ṭha, Pathian ṭihna tak tak nena ram kaihruai tur chief minister an mamawh tih sawiin, chutiang mi hruaitu nei tur chuan ngaihtuahna tak tak séng turin mipui a sáwm.

Nimina ZPM pisaa inkhawmah thu sawiin C Lalsawivunga chuan, "Mizoram hian vision nei ṭha, hmathlir nei ṭha chief minister a mamawh. Roreltu ṭha rorelna hnuaiah chuan ramin hmasawnna dik leh tluantling hmuin ke an pên ṭhin a, chutiang awm lohnaah chuan ram a pachhia a, ram a rálmuang lo a ni," a ti.

C Lalsawivunga chuan, Lengpui Airport chima mawhphurtu hrem a ni lo tih sawiin, "Tribal ni hauh lo tribal certificate kan pe a, dan anga tribal a nihna hlih a nih hnuah first class contractor nihna kan pe zui. He ramah hian dan hian awmzia a nei ta lo em ni tih hial tur a ni ta," a ti a; kum 35 chhung Mizoram state a nih tawh hnua a dinhmun chu a lungawithlak lo tih sawiin, "Dik lohnain he ramah hian tual a léng mek a, rorelna dik tundina a awm ngei theihna turin ram mipuite thawhpuiah ka sáwm che u a ni," a ti bawk.