Ni 434 hnua hripui vei hmuh tlem ber ní

June 12, Pathianni khan Mizoramah Covid-19 vei mi pahnih chiah hmuh chhuah a ni a, ni 434 hnua hripui vei hmuh chhuah tlem ber ní a ni. Nimin khan hripui vei dam tawh mi 23 chhuahtir an ni a, Covid-19 positive thi an awm lo.

Pathiannia Covid-19 positive hmuh chhuahte chu Rapid Antigen Test hmanga hmuh chhuah an ni a, sample endik zawng zawng 59 aṭangin 3.39% a ni. Hmanraw dang hmangin sample endik a ni lo. Mi pahnihte chu hmeichhia ve ve niin, Reiek leh Phuaibuang khaw mite an ni.

June 12, 2022-a Covid-19 vei hmuh chhuah zat pahnih chu kum khat leh thla hnih chuang, ni 434 hnua hmuh chhuah tlem ber ní a ni a, April 4, 2021 (Pathianni) khan mi pakhat chiah hmuh chhuah a ni.

IDSP record angin, Mizoramah Covid-19 vei 2,28,575 hmuh chhuah a ni tawh a, mipa 1,06,417 leh hmeichhia 1,22,158 an ni a, mipa aiin hmeichhia 15,741-in an tam zawk. Nimin tlai dar 5 thleng khan mi 2,27,729 (99.63%) chhuahtir an ni tawh a, mi 701 (0.31%) thi tawhin, enkawl mek mi 145 (0.06%) an awm.

Nimin tlai dinhmun angin, Mizorama district 11 zinga district pali - Siaha, Champhai, Lawngtlai leh Hnahthial district-ahte Covid-19 positive an awm tawh rih lo a; chutih laiin, Saitual district-ah mi 47 leh Aizawl district-ah mi 42 an la awm thung.

Kum 2011 chhiarpui aṭanga chhûtin, Covid-19 positive hmuh tawh zat 2,28,575 chu 20.83% a tling tawh a, mi 1,000 zelah positive 208 an awm ang a ni. Mihring 1,00,000 zelah hripui vangin mi 63 an thi tawh ang a ni bawk.