Lei verha tui lâk phal loh thu puang

Public Health Engineering (PHE) department chuan lei verh hmanga lei hnuai tui lâk chhuah chungchangah nimin khan hriattirna a tichhuak a, PHE department phalna la hmasa loin lei chhunga tui lâk chhuah/verh chhuah leh hman phal a nih loh thu a tarlang.

PHE department chuan, Mizoramah leilung zirchianna awm hmasa lo leh pawi nasa zawk a thlen theihte thlir hmasa loin hmun hrang hrangah lei chhung tui la chhuak tura verh a awm ṭhin tih a tarlang a, "Heng hi khawtlang mamawhna bakah, zawrh sum atan leh mimal hman atana tih a ni ṭhin tih hriat a ni a, nghawng ṭha lo leh pawi nasa tak thlen thei a nih avangin hriattirna tihchhuah a ni," a ti. Dan bawhchhiate chu The Mizoram Water Supplies (Control) Act, 2004 Section 17(5) hmanga hrem theih a ni.