MSHCS chungchanga dâwt sawiah MPCC-in CM Zoramthanga an puh June chhunga thupha chawi turin an phût

Mizoram Pradesh Congress Committee (MPCC) chuan chief minister Zoramthanga chu Mizoram State Health Care Scheme (MHSCS) chungchanga dâwt sawiah an puh a, tun thla, June 2022 chhung ngeia thupha cháwi turin an phût.

MPCC hruaitute chuan nimin khan Aizawl Press Club-ah thuthar thehdarhtute an kâwm a; MPCC thupuangtu Dr Lallianchhunga chuan, June 10, 2022 khan Samagra hnuaia thawkte'n inkhawmpui an hmanaah CM Zoramthanga'n, 'MSHCS atan Congress party-in kum 10 sorkarna an chan chhungin cheng khat mah an dah lo. Kan awm loh chhungin cheng khat man dah belh a awm lo,' tia a sawi thu a tarlang a, "Hei hi dâwt chiang tak hmanga mipui bum tumna leh dâwt hmanga Congress party tihmualpho tumnaah kan ngai a, kan ngai thutak hle," a ti.

Dr Lallianchhunga chuan, CM enkawl Finance department-in April 5, 2022-a RTI Act hmanga zawhna an chhannaah CM Zoramthanga thusawi dik lohzia a lang tih sawiin, "RTI chhannaa a lan danin, MSHCS sum báwmpui corpus fund hi Congress sorkar lai, March 30, 2010-a dah ṭan a ni. A tirah cheng vbc. 117.80 dah niin, dah belh zel a ni," a ti a, Congress sorkar kum tàwp December 2018-ah chuan MSHCS corpus fund-ah cheng vbc. 155.56 a awm thu a sawi.

MNF sorkar laia health care hnuaia sum dah chu cheng vbc. 50 a nih thu sawiin Lallianchhunga chuan, "Chu chu MNF vice president aṭanga an paih tâk Pu R Tlanghmingthanga'n a fate hminga Bajaj Alliance-a a dah puntir, tuna speaker ni ta Pu Lalrinliana Sailo puanzar fo ṭhin kha a ni," a ti.

MPCC Media Chairman chuan, Congress sorkar laiin MSHCS-ah bill pek theih loh a awm ngai lo nia sawiin, "MNF sorkar hnu kum thum lek chhung hian April 30, 2022-ah chuan bill pek theih loh cheng nuai 7,121 a tling tawh. Damlo bill an pek theih loh avanga mipuiah ngaihdam dil mawlh mawlh tur an nih laia dâwt an la sawi duh hi hriatthiam theih a ni lo," a ti a; Congress party dâwta a puhnaah thuphá chawi ngei turin Zoramthanga an phût tih a sawi.

MPCC hruaitute chuan, thu dik chiang tak, document nen thlapa hmuh theih a awm reng chunga dâwt ngialngan sawiah CM Zoramthanga puhin, "Politics-ah hian dâwt sawi a thiang lo. CM phei chu thu belhchian dâwl lo sawi mai mai tur a ni lo. Pu Zoramthanga erawh chuan dâwt tih a hriat chian em em pawh a thutak sawi hmiah zel a, biak nuam tak a nihna phêna dâwt sawi hreh miah lo hi Mizoramin kan chhiatpui mek a ni," an ti.

MPCC Media department chuan nimin vêk khan chief minister Zoramthanga chu a thusawi avangin June 2022 chhung ngeia thupha cháwi tura an phûtna an thawn a; thupha a chawi lo a nih chuan action plan mumal tak nen hmalak an tum thu sawiin, "Na takin hma kan la ngei dawn a ni," tiin an sawi a ni.