Education dept-in 2019 hnuah zirtirtu lâk belh lo ; SEDP zirtirtu-ah Education Dept. a inrawlh lo

School Education department chuan January 2019 aṭanga kumin May 31 thlengin Directorate of School Education hnuaia thawk tur mi 57 an la tawh a, chu'ng zingah chuan zirtirtu an tel lo. SEDP hnuaia zirtirtu lâkte chu sorkar lâk a ni lo a, School Education department an inrawlh lo tih tarlan a ni.

Hetih lai hian, School Education minister Lalchhandama Ralte chuan May 23, 2022 khan Mizoram Middle School Teachers Association (MSTA) silver jubilee lawmna a hmanpuinaah, School Education department-ah thawktu mi 2,000 chuang lâk a ni tawh thu a sawi thung.

RTI Act hmanga SEDP hnuaia zirtirtu lâk tawh zat zawhna chu School Education department SPIO chuan nimin khan a chháng a; SEDP hnuaia thawktute chu School Manage­ment Committee kaltlanga lak a nih avangin report an la dawn loh thu a tarlang.

SPIO chuan, SEDP hnuaiah thawktu lâk a nihin advertisement chhuah hriat a nih loh thu a tarlang a, "SEDP hnuaia thawktu lakte hi sorkar lâk ni loin, sorkarin ṭanpuina (grant) sikul hnena a pek hmangin school-in zirtirtu indaih lohna phuhru tura a lak an ni a. Thawktute hi sorkar hnuaia thawk ni loin, School Management Committee hnuaia thawk an nih avangin one-time grant pek bak hi School Education department a inrawlh lo a ni," a ti.

School Education SPIO-in a tarlan danin, kum 2019 aṭanga May 31, 2022 thlenga School Education department-in SDP hnuai ni loa thawktu a lak tawh mi 57-te chu group-D (muster roll) 54, LDC (regular) pahnih leh data entry operator (co-terminus) pakhat an ni.

Directorate of School Education-in kum 2019 aṭanga kumin May thla tàwp thlengin thawktu (a nghet leh nghet lo) mi 57 chiah lak a nih thu an tarlan lai hian, Education minister Lalchhandama Ralte erawh chuan, "Hri lêng avanga sum lama harsatna kan tâwk chung pawhin zirnain hma a sawn zel theih nan kawng hrang hrangin hmalak a ni a, thawktu mi 2,000 chuang lak a ni tawh," tiin May 23, 2022 khan a sawi a ni.

School Education Directorate hnuaiah thawktu 4,843 an awm mek a, chu'ng zinga mi 4,793 chu a ngheta thawk niin, a nghet loa thawk mi 50 an awm a; zirtirtu bik zingah muster roll (MR) mi 871 an awm.

Education Directorate hnuaia regular post awm zawng zawng chu 8,361 a ni a, chu'ng zinga 4,781 chu hnawh khat niin, post ruak 3,580 a awm a, post ruak awm zat hi post awm zat aṭangin 42.82% a tling.