AMC-in Complaint Box an siam thar

Aizawl Municipal Cor­poration (AMC) Enforce­ment Committee-in Aizawla in sak chungchang leh ṭul danga mipuite'n ziaka an harsatna an thlen theihna tur Complaint Box an dah thar a, nimin khan Enforcement Committee chairman John Zosangliana Ralte, councillor-in a hawng. Báwm hi AMC pisa ground floor-ah dah niin, a duh apiang tan complaint dah theih a ni.

John Zosangliana Ralte chuan, Complaint Box-a lehkha thehluttute hming leh nihna chu thup a nih dawn thu sawiin, "Mipui thlàwpna kan mamawh dawn. Inṭhenawm khawvennaah hian inhêk emaw, ṭhenawmte dik lohna emaw sawi kan harsat ṭhin avangin vawiin thleng hian kan Building Regulation pawh hman dik a harsat phah a ni," a ti.

Complaint Box chu mipui tana dah a nih thu sawiin John Zosangliana chuan, "Mipuite'n in sak dan bakah, kan subject panga zinga mi ni lo pawh an rawn complaint thei a, keini'n en zui tlak a nih leh nih loh kan en ang. Enzui tlak a nih chuan councillor-te leh technical person-te nen kan bawhzui ang," a ti a; Aizawl khawpui ṭhatna turin hmalak zel an tum thu sawi.

John Zosangliana sawi danin, AMC Enforcement Committee-ah AMC-a office luah lo coucillor 13 an tel a, Municipalities Act 2007 (as amended in 2019)-in a phal angin March 10-11, 2022 chhunga Board of Councillors meeting-in a din a ni.

Committee hian enkawl bik tur subject panga - Building Regulation 2012, Solid Waste Management by-laws 2019, Site Development and Slope Modification Regulation 2017, Licencing Regulations leh Advertisement & Hoarding Regulations a nei a; complaint thehluttu hming leh sawisel chhan chhan chiang taka ziah tur a ni.

Enforcement Committee-ah hian chairman chu John Zosang­liana Ralte a ni a, vice chair­man chu Rosiamngheta niin, member secretary chu AMC Joint Commissioner a ni. Member-te chu Lalfakzuala Chenkual, Vanlalneia, David Zohmangaiha, Malsawmzuala Ralte, Chuauzikpuii, C Lalchhandami, Baryl Vanneih­sangi, Christina Roluahpuii Sailo, R Lalawmpuii, Ramthanzauvi leh Zodingpuii te an ni.