KHAWTHLIR

Blood Donor Day
Vawiin June 14 hi World Blood Donor Day vawi 18-na a ni a, thupui chu 'Donating blood is an act of solidarity, join the effort and save lives' tih a ni. Mizoram hmun hrang hrangah hman a ni dawn a, Aizawlah chuan Aijal Club-ah hman a ni ang. Thisen petute ní a nih angin, thisen pe ṭhate hnenah chawimawina hlan a ni dawn a ni.

Thisen pe
National Institute of Technology, Mizoram chuan nimin khan an hmunah thisen pe huaihawtin, Civil Hospital, Aizawl tan thisen unit riat an pe a, petute mipa pasarih leh hmeichhia pakhat an ni.

MLA-in hmanpui
Zampui tlanga Mizo intél khâwm pawl ṭhalai, Mizo Convention Youth Conference chuan June 9-11, 2022 chhung khan Hmunpui khuaah intawh khawm lian hmasa ber an hmang a, Mizoram Youth Commission chairman Dr Vanlalṭanpuia, MLA-in a hmanpui. Intawhkhawm hi Mizoram aṭangin Mizo People Convention, ZORO leh MZP hruaitute pawhin an hmanpui a ni.

GAC-ah Green Mizoram Day
Govt. Aizawl College chuan nimin khan Mualpuia an college campus-ah Green Mizoram Day an hmang a, bialtu MLA Lalchhuanthanga'n a hmanpui. GAC campus-ah hian thing ṭiak 100 an phun a ni. Lalchhuanthanga chuan, "Thing ṭiak kan phun hnem tawh viau a, a enkawl lam erawh kan ngaihsak lutuk lo ṭhin. Kan thing phun tam tawh dan en hi chuan ramngaw ṭha tak nei thei tawh tur kan ni. Kan thing phunte enkawl lamah ṭan kan lâk a, kan vil ngun a ṭul hle a ni," a ti.

Thehluh theih
Indian Council for Child Welfare chuan October 15, 2022 thleng an website www.iccw.co.in ah naupang huaisen, entawn tlak leh chawimawi phûte thehluh theih a nih thu a tarlang.