Assembly budget session a tiak

March 14, 2017-a ṭan Mizoram Assembly budget session chu nizan dar 7:05 khan a ṭiak. Kum 2017-18 atana Mizoram budget cheng vbc. 8803.10 pass a ni a; Chief minister Lal Thanhawla chuan, House-a thusawite lo dawnsawn dan thiam ni se a duh thu a sawi.

Nimin khan CM Lal Thanhawla depart­ment chan enkawlna tur sum ruahmante sawihoa pass a ni a; sawihona a khai­khawmnaah Chief Minister chuan, House chhungah member-te'n zalen takin thu an sawi ṭhin tih sawiin, "Mimal takin thu kan sawi ṭhin. Kan thusawite hi sorkar emaw party ngaihdan a ni kher lo. Mimalin a ngaihdan a sawi a, kan ngaihdan lo a lo awm a nih pawhin react dan thiam a ngai," a ti.

Lal Thanhawla chuan kawng chhiatzia an hriat thu sawiin, "Ṭhál a lo ni a, ṭan kan la a, tun ang khua kan tawng a ni. Eng chen nge tiang khua hi kan tawn dawn kan hre lo a, a pawi khawp ang. Theih ang angin hma kan la a, hmalak chak theih a ni lo," a ti a; kawngpui ṭha mamawhzia an hria a, theihtawp an chhuah zel thu a sawi.

National Highway-ah state sorkarin thuneihna a nei tlem tih sawiin CM Hawla chuan, "Kan ram leilung awm dan hre miah loin NH siam hna an rawn thawk ṭhin a, nawr nawr an ngai ṭhin," a ti.

Chief Minister chuan kawlphetha chungchang sawiin, "Tun hma chuan state-in power-a thuneihna a neih chin chu megawatt 5 a ni a, Deve Gowda prime minister a nih hnuah megawatt 25 chinah tihsan a ni. Power kan mamawh ang kan neih theihna atan theihtawp kan chhuah mek," a ti a; kawlphethaah state thuneihna a tlem ṭhin avangin hydel project lian tun hmain siam a harsat thu a sawi.

Mizoram lui zawng zawng deuh thaw hydel project siamna atan company-te nen inremna thuthlung siampui a nih thu sawiin Hawla chuan, "Investigation tihte a ngai a, chumi hnuah pawh clearance hrang hrang neih a ngai. Chuvangin, hna thawh zung zung theih a ni lo," a ti.

Chief Minister chuan, hydel project lian tham deuh pakhat siam a, intodelh chu an rilruah a awm thu sawiin, "Hydel project lian siam dawn chuan sum a ngai tam a, kan state neih loh zawng tak a ni si," a ti a; hydel project lian siam tur chuan sum zawn a ngaih thu a sawi.

NLUP chungchang sawiin Lal Thanhawla chuan, "NLUP hi Pathian duhzawng a ni ang, sawiselna karah kan kalpui zel. A tirah khawi aṭangin sum kan hmuh dawn kan hre lo, mahse, a lo awm mai. NLUP hun a zo tawh a, la hlawhtling lo, ṭang duh si an awm a, chung mite puihna atan chuan NEDP duan leh a nih thu a sawi.

Nimina session tawp ni-ah hian kum 2017-18 chhunga department hrang hrangte tana sum ruahman hman phalna, 'The Mizoram Appropriation (No. 2) Bill, 2017' a put luh chu lungrual taka pass a ni.

Speaker Hiphei chuan, tun ṭum session-ah ngaimawh tur a awm loa a hriat thu a sawi a, "State dangte ngaihtuahin a felfai a, a lawmawm hle. Mizoram leh hnam a tizahawm a, a chawimawi em em a ni," a ti a; ṭawng khat hmanga session kalpui theih a ni ṭhin chu a vanneihthlak thu a sawi lang bawk.

Speaker tarlan danin, tun ṭum session chhung hian House-a chhan chi zawhna (starred question) 427 lutin, 400 pawm a ni a, House-ah zawhna 89 chhan hman niin, zawhna 154 chu unstarred question-ah leh a ni. Ziaka chhan chi zawhna (unstarred) 77 a lut a, 71 pawm niin paruk hnâwl a ni.

House-ah report 20 leh paper 34 pharh a ni a, bill panga lutin, pass vek a ni. Private member resolution 75 a lut a, pahnih sawiho a ni.

Congress member T Sangkunga resolution, 'All India service-ah separate cadre neih theih nan theihtawp chhuah ni rawh se,' tih chu pass a ni a; MNF member Lalrinawma resolution, MLPC Act hlih rawtna hnâwl a ni thung.