MCHTA-in lungawi lohna Lantir an titàwp lailâwk

Mizoram CSS Hindi Teachers Association (MCHTA) chuan an hlawh pek leh dah ngheh phûta lungawi lohna an lantir chu an titawp lailâwk.

Hetihlai hian Nilaini zinga Police-in MCHTA mi leh sa an man mi 23-te chu intiamkamna ziahtir an nih hnuah Nilaini zan dar 8 vel khan chhuah an ni.

MCHTA member man chhuah leh tâkte'n intiamkamna an ziahah chuan, an service chung­changa sorkar an nawrnaah tharum thawhna hmang tawh lo tur te; sorkar an nawr nana hma an laknaah an member-puite hriselna leh taksa chunga chhiatna eng pawh thleng se, sorkar mawhphurhna a nih loh tur thute; dan leh thupek tibuai thei zawnga lungawi lohna lantir tawh lo tura intiamnate a tel. CM Bangla gate tichhiaa bangla kawta an punkhawm avangin ngaihdam an dil bawk.

MCHTA hruaitute ngenna anga Mizoram Kohhran Hruaitu Co­mmittee (MKHC) hruai­tute'n a ṭul anga hma­lak an tum avangin MCHTA hruaitute chuan chaw ngheia an thil phût an nawr chu an titawp lailâwk hrih.

MKHC hruaitute leh MCHTA hruaitute chu nimin khan Synod Mo­derator pisaah an ṭhukhawm a; MKHC hruaitute chuan palai hna thawh an remti. Sorkar an dawr chhung chu chaw nghei leh thil danga nawrh chhunzawm tawh lo turin MKHC hruaitute chuan Hindi zirtirtute chu an ngen a ni.