Mizo Carbon-in bungrua vbc. 11.33 man ; An phur angin Taxation-in an chhinchhiah

Taxation minister Lalsawta chuan, M/s Mizo Carbon Ltd.-in January 4, 2012 aṭanga July 10, 2014 chhunga state páwn aṭanga Mizo­rama bungraw an lak luh man zat chhinchhiah chu cheng vbc. 11.33 a nih thu House a hrilh.

MNF member Lal­ruatkima zawhna chhanga Taxation Minister sawi danin, M/s Mizo Carbon Ltd.-in bungrua an lak luh aṭanga value added tax (VAT) an pek zat chu Rs. 40,00,403 a ni. An lungalhthei phurh luh record chu metric tonne 29,046.2 a ni a, hei hi truck trip 2368 a ni.

M/s Mizo Carbon Ltd. hi Indian Mizoram VAT Act, 2005 hnuaiah register a ni a, a proprietor chu Mar­garet Varte a ni a, pro­prie­torship-ah register a ni.

Indian Partnership Act, 1932 hnuaiah ni 16.8.2011 ah register an ni a, hemi hnu hian propriertorship-ah thlak a ni a, a chhan chu part­ner Ravi Gulgulia a inhnuhdawh vang a ni.

Lalruatkima chuan VAT-ah Margaret Varte hming register a nih laia Industries dept. lamah Rajiv Gulgulia hminga in regsiter a nih chhan leh way bill 2207 pek chhuah a nih laia truck trip 2368 phur anga record a nih chhante zawtin, Theiriat to Aizawla truck-in ni khata vawi ruk leh vawi ngate a kal anga RTI hmanga zawhna chhan a nih thute a sawi.

Finance Minister chuan M/s Mizo Carbon Product chu ACB-te'n an chhui mek thu sawiin, "Heng chhanna tur docu­ment pawimawh ṭhen­khat chu ACB-in an kawl a, an chhui zawhah zawhna ṭhenkhat chhanna chu a awm thei ang," a ti.