MKHC-in MLA ṭhenkhat thusawi an dem

Mizoram Kohhran hruai­tute Committee (MKHC) chuan thu­chhuah siamin, Assembly session neihah zu chung­changa private resolu­tion sawihonaa ram hruai­tu ṭhenkhatte'n Pathian thu, kohhran leh rawng­bawltute ngainêp záwnga thu an sawi chu pawi an tih thu an tarlang.

Assembly House-a MLA-te thu sawi chung­changa hi MKHC Exe­cutive Committee mem­ber-te March 30, 2017-a ṭhukhawm chuan an thlirho a, "Kan ram rorelna sang bera zu zawrh chungchanga private resolution sawihonaah ram hruaitute'n Pathian thu, kohhran leh rawng­bawltute ngainêp zawng leh tihmaimâwk zawnga an thusawite kan lo hriatin pawi kan ti hle. Kan rawngbawltute leh koh­hran mipuite rilru pawh a tina hle a ni," an ti.

MKHC chuan, "Mizo­ram, Kristian state kan tih mai rorelna sang berah hetianga dik lo taka Pathian thu kaihlekna leh rawngbawltute timual­pho zawnga kan ram hruai­tute'n thu an sawi ta mai hi ṭha kan ti lo hle," an ti a; ram rorelna sang ber a zahawm zel theih nan leh Kristianna zahawm taka vawnhim zel a nih theih nan Pathian thu, kohhran leh rawngbawltute ngainêp leh tihmaimâwk zawnga thusawi awm tawh lo se an duh tak zet thu an tarlang.