Peak load laia kawlphetha mamawh 83.48% state pâwn atanga lei a ni

Mizoram sorkar chuan, kawlphetha mamawh san lai ber (peak load) laiin state páwn aṭangin kawlphetha megawatt 96 a lei ṭhin a, hei hi peak load laia power mamawh zat megawatt 115 aṭanga chhûtin 83.48% a ni.

Power & Electricity department changtu chief minister Lal Thanhawla'n nimina MNF member Lalruatkima zawh­na ziaka chhangin, peak load laia Mizoram power mamawh zat chu megawatt 115 a nih thu a tarlang.

Chief Minister tarlan danin, peak load laia Mizoramin kawlphetha a mamawh megawatt 115 phuhrukna atan transmission leh transformation lama Mizoramin system neihte'n a phâk chin megawatt 96 vel state páwn aṭangin lak luh ṭhin a ni.

Sorkar kum liam ta 2015-16 chhung khan Mizoram sorkarin kawlphetha leina atan cheng vbc. 210 a hmang a, kawlphetha hi unit khat Rs. 3.48 hisâpin million unit 565.55 a lei a ni. Hetih lai hian, kum 2015-16 chhung hian kawlphetha hman man aṭangin cheng vbc. 166.35 hmuh lêt a ni.

Kum 2015-16 chhung hian Mizorama hydel project hrang hrang aṭangin megawatt 28.88 siam chhuah a ni a, siam chhuah tamna ber Selui-B Hydel Project aṭangin megawatt 14.71 siam chhuah a ni a, power siam chhuah zat hi kum hmasa aiin a tlahniam nasa hle a ni.

Mizorama kawlphetha
siam chhuah dan
(Megawatt)
Hydel Project 2013-14 2014-15 2015-16
Serlui A 0.57 0.03 Nil
Tuipui 0.65 Nil 0.58
Teirei 1.21 0.90 Nil
Khawiva 1.58 1.04 1.82
Maicham-I 2.06 30.08 3.32
Maicham-II Nil 1.18 2.30
Kau-Tlabung 6.76 2.69 5.98
Tuipanglui Nil Nil Nil
Lamsial Nil 0.27 0.17
Serlui-B 42.49 27.06 14.71